Թուրքիայի իշխող «Արդարություն եւ զարգացում» կուսակցության հրապարակած նախընտրկան հրովարտակում չի հիշատակվում Իսրայելի հետ լարված հարաբերությունների մասին, իսկ Հայաստանը մեղադրվում է հայ-թուրքական գործընթացը փակուղի մտցնելու մեջ, գրում է թուրքական Today’s Zaman-ը:
Թուրքիայի վարչապետ Ռեջեփ Թայիփ Էրդողանը, որի կուսակցությունն, ամենայն հավանականությամբ, հկաղթի հունիսի 12-ին կայանալիք խորհրդարանական ընտրություններում եւ կշարունակի ղեկավարել երկիրը, մինչեւ 2023 թվականի համար հրովարտակ է հրապարակել, որտեղ ներկայացրել է իր վերաբերմունքը մոտ ու հեռու երկրների նկատմամբ: Սակայն, փաստաթղթում հիշատակում չկա Իսրայելի հետ Թուրքիայի լարված հարաբերությունների եւ այդ հարաբերությունները հաղթահարելու մասին:
Հայաստանի հետ հարաբերությունները նույնպես իշխող կուսակցության հրովարտակում առաջնահերթությունների մեջ չեն: Փաստաթղթում ասվում է, որ Հայաստանի ոչ կառուցողական մոտեցումները խանգարեցին Թուրքիային հասնել ցանկալի նպատակին երկու երկրների հարաբերությունների նորմալացմանը:
«Մեր դիրքորոշումը ղարաբաղյան խնդրի լուծման եւ ցեղասպանության մասին պնդումների հարցում հստակ է: «Արդարություն եւ զարգացում» կուսակցությունը թույլ չի տա ոչ մի որոշում, որը հիմնված չի լինի Թուրքիայի նկատմամբ արդարության եւ ազնվության վրա: Ինչ վերաբերում է փոխադարձ եւ միաժամանակ քայլերին, ապա Թուրքիան ձեռնպահ չի մնա այն քայլերից, որոնք նա պետք է անի»,- բազմիմաստ կերպով նշվում է փաստաթղթում: