Հայաստանի վարչապետ Նիկոլ Փաշինյանի գործունեությունը եւ քարոզարշավը, որին նա մասնակցում է, հստակ տարանջատված են: Այս մասին այսօր` մարտի 9-ին, Ազգային ժողովում տեղի ունեցած ավանդական ճեպազրույցի ժամանակ ասաց «Իմ քայլը» իշխող դաշինքի պատգամավոր Սուրեն Գրիգորյանը` մեկնաբանելով «ՈՉ»-ի շտաբի ներկայացուցիչների քննադատությունը, որոնք դժգոհություն են հայտնել, որ ՀՀ վարչապետը Լոռու մարզ կատարած այցի ընթացքում խախտել է օրենքը, քանի որ ճանապարհի վերանորոգման աշխատանքներին ծանոթանալու ընթացքում հանկարծ սկսել է հօգուտ «ԱՅՈ»-ի քարոզարշավ իրականացնել:
Ըստ պատգամավորի` Փաշինյանը քարոզարշավին մասնակցում էր որպես «մասնավոր անձ», այլ ոչ թե որպես վարչապետ: «Այն փաստը, որ մենք գիտենք, որ այդ անձը վարչապետ է, դեռ չի նշանակում, որ նա միշտ հանդես է գալիս որպես կառավարության ղեկավար: «Հանրաքվեի մասին» օրենքով սահմանվում է, որ իշխանության ներկայացուցչի կողմից քարոզչություն չի կարող իրականացվել իր պարտականությունների կատարման ընթացքում»,- պարզաբանեց Գրիգորյանը: Ուստի պատգամավորն այս քննադատությունն «արհեստական եւ անհիմն» համարեց:
