Ամուլսարի շահագործման հարցը մեր նախարարության հետ առնչվող հարց չէ. մՄենք կրկին խնդիրներ ենք տեսել, խնդիրներն ուղարկել ենք քրեական գործի: Այս մասին այսօր՝ մարտի 9-ին, ԱԺ-ում լրագրողների հետ զրույցում ասաց ՀՀ շրջակա միջավայրի նախարար Էրիկ Գրիգորյանը` խոսելով Ամուլսարի հանքի շահագործման եւ խնդիրների հանգուցալուծման մասին։
«Ի՞նչը պետք է հանգուցալուծվի։ Շահագործվելու է, թե ոչ, դա մեր՝ նախարարության հետ առնչվող հարց չէ այս պահին։ Խնդիրներն ուսումնասիրվում են, որպեսզի տեսնենք կազմակերպությունը կեղծ տվյալնե՞ր է ներկայացրել, թե ոչ, եթե կեղծ է, ապա ինչի հետեւանք է, եթե կեղծ չէ, ապա պետական մարմիններն ինչ-որ բան ճիշտ չեն արել»,- նշեց նա։
Հարցին, թե արդյոք նախարարությունը գործի ընթացքին հետեւո՞ւմ է, նախարարը պատասխանեց, որ իրենց մասնագետները որպես փորձագիտական ներուժ, ներգրավված են այդ գործում:
Անդրադառնալով տարածքների ապօրինի սեփականաշնորման հարցին՝ Գրիգորյանը նշեց, որ անտառային օրենսգիրքը հստակ արգելում է անտառային հողերի օտարումը ֆիզիկական եւ իրավաբանական անձանց, բայց կար ընթացակարգ, որի միջոցով հնարավոր էր հողի կատեգորիան փոխել եւ հետո վաճառել։
«Կարող եմ նշել, որ վերջին մեկ տարվա ընթացքում անտառային հողերի կատեգորիա չի փոխվել։ Նախկինում քրեական գործեր կային, մենք նաեւ ուսումնասիրություններ ենք արել, ՊՎԾ-ն էլ է աշխատել բոլոր այն տեղերում, որտեղ հիմքերը բավարար չեն եղել, մենք մեծ ուրախությամբ այդ հողերը հետ կընդունենք»,- ասաց Գրիգորյանը։
