Սահմանադրական դատարանի դատավորների մի մասը ակնհայտորեն քաղաքական ազդեցության տակ են որոշ քաղաքական խմբերի, կուսակցությունների կամ առանձին անհատների: Այս մասին, այսօր՝ մարտի 11-ին, գորիսում «Այո»-ի քարոզարշավի ժամանակ իր խոսքում նշեց ԱԺ «Իմ քայլը» խմբակցության ղեկավար Լիլիթ Մակունցը:
Նրա խոսքով, ՍԴ դատավորները դա անում են անթաքույց, անում են քաղաքական տեքստեր հնչեցնելով. «Անում են ի հեճուկս նրա, որ դատավորն իրավունք չունի զբաղվել քաղաքականությամբ եւ իրավունք չունի հնչեցնել քաղաքական տեքստեր: Կա նաեւ հարցի բարոյական կողմը,. ՍԴ նախագահ Հրայր Թովմասյանը, ով հեղինակներից է այն Սահմանադրության, որ ընդունվել է 2015-ին, ինչ-որ մի փուլից որոշում է, որ քանի որ խոսքն իրեն է վերաբերելու, ձեռնտու չէ պաշտոնավարել 6 տարի, եթե հնարավոր է ինչ-որ աճպարարության շնորհիվ պաշտոնավարել մինչեւ 2035 թվականը: Հաշվի առնելով նաեւ այն, որ ՀՀ կառավարությունը նախաձեռնել է դատաիրավական բարեփոխումների մեծ օրակարգ, որը ենթադրում է, որ դատական համակարգը պետք է մաքրվի, փոխվի, արդյունավետ դառնա նրա աշխատանքը, բնականաբար, այն ՍԴ դատավորները, որոնք քաղաքական ազդեցության տակ են, չեն հաստատելու այն բարեփոխումների օրակարգը, որ նախաձեռնում ենք մենք»,-ասաց Մակունցը:
Նա ընդգծեց, որ ՀՀ-ում դատական համակարգը, այդ թվում ՍԴ-ն պետք է լինի անկախ, որպեսզի եթե ապագայում որեւէ ուժ փորձ կատարի կեղծել ընտրություններ, ապա այն ՍԴ-ն, որը ժողովուրդը «Այո» ասելով փոխելու է, այդ դատարանը չի սրբագրելու որեւէ կեղծիք:
