Այսօր Հայաստանում առկա 360 հազար գյուղացիական տնտեսություններից կեսից ավելին վարկային խնդիրներ ունեն եւ այսօր կառավարության կողմից առաջարկվող վարկային ծրագրից օգտվելու հնարավորություն անգամ չունեն: Այս մասին այսօր՝ մարտի 25-ին, ԲՀԿ խմբակցության հատուկ նիստի ժամանակ նշեց ԲՀԿ խմբակցության պատգամավոր Սերգեյ Բագրատյանը:
Նրա խոսքով, գյուղացիների շուրջ կեսը հնարավորություն չունի իր հողը մշակելու, քանի որ դրա համար չունեն պարարտանյութ, սերմացու, չունեն միջոցներ. «Այս պայմաններում մենք առաջարկում ենք մոռանալ, մի կողմ թողնել սեւ ցուցակները: մենք պետք է կարողանանք ֆինանսավորել գյուղատնտեսության ռեալ սեկտորը: Պետք է ֆինանսավորել գյուղացու աշխատանքը, ոչ թե այն պատմությունը, որ առաջացել է: Տարիներ շարունակ բարձր տոկոսներով վարկերը սնանկացրել են գյուղացիներին: Արդիական է ջրի խնդիրը, մարդիկ ահազանգում են, որ ապրիլի 15-ից նոր պետք է ջուր տան, որովհետեւ դեռ խորհրդային տարիներից այդպիսի որոշում է ընդունվել: Մարդիկ այսօր ծառատունկով են զբաղվում, այսօր պետք է ջուրը տալ»,-ասաց Բագրատյանը:
