Չինացի հետազոտողները հայտնաբերել են COVID-19 առաջացնող SARS-CoV-2 վիրուսի գրեթե ամբողջ կառուցվածքը երկու շաբաթ ավելի առաջ, քան Պեկինը պաշտոնապես պատմել է դրա մասին։ Այս մասին տեղեկացրել է The Wall Street Journal թերթը՝ հղում կատարելով ԱՄՆ առողջապահության նախարարության եւ սոցծառայությունների փաստաթղթերին։
Պարբերականի տեղեկացմամբ՝ 2019թ. դեկտեմբերի 28-ին չինացի գիտնականները ներբեռնել են SARS-CoV-2-ի կառուցվածքը տվյալների ամերիկյան շտեմարանում։ Պեկինն այն ժամանակ հիվանդության բռնկումն Ուհանում անվանել էր «անհայտ թոքաբորբ»։ Չինաստանը վիրուսի կառուցվածքը փոխանցել է Առողջապահության համաշխարհային կազմակերպությանը միայն 2020թ. հունվարի 11-ին։
Թերթն ընդգծում է, որ այս տեղեկությունը «լույս չի սփռում այն բանի վրա, թե ինչպես է առաջացել COVID-ը», բայց ցույց է տալիս, որ աշխարհը մինչ այժմ չունի համավարակի ծագման լրիվ պատկերը։ Երկու շաբաթը կարող էր «վճռական դեր խաղալ»՝ օգնելու համար միջազգային բժշկական հանրությանը որոշել, թե ինչպես է տարածվում նոր վիրուսը, եւ սկսել հնարավոր պատվաստման աշխատանքը։