Բրազիլիայի դաշնային ոստիկանությունը մեղադրանք է ներկայացրել երկրի նախկին նախագահ Ժաիր Բոլսոնարուին՝ պատվաստումներին առնչվող գրառումներում հայտնաբերված խարդախությունների կապակցությամբ:
Ըստ Reuters գործակալության՝ երկրի Գլխավոր կարգավորիչի գրասենյակի հետաքննությունը ցույց է տվել, որ Բոլսոնարուի պատվաստման մասին գրառումները կեղծ են եղել:
Բոլսոնարուից բացի մեղադրանք է առաջադրվել նաև նրա նախկին օգնականներից մեկին՝ Մաուրո Սիդուին, որը հետաքննության շրջանակում ձերբակալվել էր անցյալ տարվա մայիսին։
Ըստ աղբյուրների՝ Բոլսոնարուին մեղադրանք է առաջադրվել երկրի միացյալ առողջապահական համակարգում կեղծ տվյալների գրանցման, ինչպես նաև հանցավոր կազմակերպության ստեղծման կասկածանքով։
Բրազիլիայի նախկին նախագահը Reuters-ի հետ զրույցում հաստատել է, որ կորոնավիրուսի դեմ չի պատվաստվել և հայտարարել է, որ ինքը հանգիստ է այդ հարցում։
«Դա ընտրողական հետաքննություն է, ես հանգիստ եմ, ոչինչ պարտական չեմ։ Աշխարհը գիտի, որ ես չեմ պատվաստվել»,- ասել է Բոլսոնարուն։
Բրազիլայի նախագահի պաշտոնում Բոլսոնարուն բազմիցս թերագնահատել է պատվաստման և համավարակի ընթացքում սոցիալական հեռավորությունը պահպանելու կարևորությունը:
Ընդ որում, Բրազիլիայում կորոնավիրուսից մահացել է ավելի քան 700 հազար մարդ:
