Մենք ունենք գործողությունների կիրառման մի շարք փաթեթներ նախապատրաստած, որոնք այս կամ այն փուլում կարող են մտնել ուժի մեջ. Չարենցավան անձանց եւ տրանսպորտային միջոցների մուտքն ու ելքը արգելող որոշումը չպետք է դուրս գար: Այս մասին, այսօր՝ մարտի 31-ին, լրագրողների հետ հանդիպման ժամանակ նշեց ՀՀ փոխվարչապետ, պարետ Տիգրան Ավինյանը:
«Բայց տեխնիկական պատճառներով այդ ծրագիրը դուրս է եկել որպես կատարման ծրագիր եւ շատ արագ տեղ է հասել, սկսել է կատարվել, բայց այդ ծրագիրն ընդամենը պլանային աշխատանքների տրամաբանությամբ ծրագիր է եղել, եւ այլ ծրագրերի հետ համատեղ, եղել է մեր համակարգում»,- ասաց նա:
Տիգրան Ավինյանի խոսքով՝ պարետատունը տարբեր իրավիճակների համար ունի մշակած մարտավարություն. «Մենք ունենք տարատեսակ նախապատրաստած պլաններ տարբեր քաղաքների վերաբերյալ եւ ունենք ծրագրեր, որոնք ժամանակ առ ժամանակ փոփոխվում են: Ամեն օր մենք ունենք գործողությունների կիրառման մի շարք փաթեթներ, որոնք այս կամ այն փուլում կարող են մտնել ուժի մեջ»,- ասաց նա։
Հիշեցնենք, որ պարետի հրապարակած այդ որոշմամբ մարտի 31-ի ժամը 18:00-ից մինչեւ ապրիլի 5-ի ժամը 23։59-ը Կոտայքի մարզի Չարենցավան համայնքում՝ բացառությամբ Ֆանտան բնակավայրի, պետք է արգելվեր անձանց եւ տրանսպորտային միջոցների մուտքն ու ելքը՝ բացառությամբ առաջին անհրաժեշտության ապրանքների, պարագաների, սննդամթերքի, դեղորայքի, վառելիքի մատակարարման: Կարճ ժամանակ անց Պարետը չեղարկել էր Չարենցավան համայնք անձանց եւ տրանսպորտային միջոցների մուտքն ու ելքը արգելող որոշումը: