Ուկրաինայի նախագահ Վլադիմիր Զելենսկին հայտարարել է, որ Կիեւը հետ չի կանչի Վրաստանից Ուկրաինայի դեսպանին, հայտնում է «Նաշ» հեռուստաալիքը:
«Մենք գերազանց հարաբերություններ ունենք վրաց ժողովրդի հետ: Չնայած ամեն ինչին` մենք հետ չենք կանչի Վրաստանում մեր դեսպանին: Մեր երկրների միջեւ հարաբերություններն ավելի հարատեւ են, քան ցանկացած երկրի ղեկավարություն: Ինձ թվում է, որ սա վրացական կողմի սխալն է»,- հայտարարել է նախագահը` մեկնաբանելով Թբիլիսիի որոշումը հետ կանչել իր դեսպանին խորհրդատվությունների համար Վրաստանի նախկին նախագահ Միխեիլ Սաակաշվիլիի` Ուկրաինայի Բարեփոխումների խորհրդի գործադիր կոմիտեի ղեկավարի պաշտոնին նշանակումից հետո:
Ըստ նրա` կադրային քաղաքականությունը վերաբերում է միայն պետությանը եւ այն քաղաքացիներին, ովքեր ապրում են այդ երկրում: «Սա է մեր որոշումն է, մեր ներքին քաղաքականությունը: Պարոն Սաակաշվիլին Ուկրաինայի քաղաքացի է, ունի ուկրաինական անձնագիր: Ես Ուկրաինայի նախագահն եմ եւ նրան նշանակել եմ բարեփոխումների խորհրդի գործադիր կոմիտեի նախագահ»,- հավելել է Զելենսկին: