ՄԱԿ գլխավոր քարտուղարը կրոնական առաջնորդներին կոչ է անում մարտահրավեր նետել կորոնավիրուսի համավարակի ֆոնին ազգայնականություն, ատելություն եւ հակամարտություններ հրահրող «սխալ ու կործանարար լուրերին», հայտնում է AP-ը։
Անտոնիո Գուտերիշը նախազգուշացրել է, որ «ծայրահեղականները եւ արմատական խմբավորումները ձգտում են օգտագործել նվազող վստահությունը ղեկավարության հանդեպ եւ սեփական նպատակներին հասնելու մարդկանց խոցելիությունը»։ Նրա խոսքերով՝ կրոնական առաջնորդները կարող են կարեւոր դեր խաղալ COVID-19-ի խնդիրների լուծման հարցում։
Նա նշել է համավարակի տարածմանը զուգընթաց «կանանց եւ աղջիկների հանդեպ բռնությունների տագնապալի աճի» մասին։ Գուտերիշը կոչ է արել կրոնական առաջնորդներին «կտրականապես դատապարտել այդպիսի գործողությունները եւ սատարել գործընկերության, հավասարության, հարգանքի ու կարեկցանքի ընդհանուր սկզբունքները»։
Նա նաեւ կոչ է արել միանալ COVID-19-ի մասին ապատեղեկատվության դեմ պայքարին։