10 000 դրամի չափով տուգանք է սահմանվում բաց տարածքում դիմակ չկրելու համար: Այս մասին այսօր՝ մայիսի 19-ին, ԱԺ արտահերթ նիստում վարչական իրավախախտումների մասին օրենսգրքում փոփոխություններ եւ լրացումներ կատարելու մասին օրինագծի արագացված ռեժիմով քննարկման ընթացքում հայտարարեց արդարադատության փոխնախարար Վահե Դանիելյանը:
Նրա խոսքով՝ Հայաստանում կորոնավիրուսի տարածման ֆոնին անհրաժեշտ է խստացնել ազատ տեղաշարժի կանոնները:
«Այժմ գործում են ազատ տեղաշարժի հստակ սահմանափակումներ: Առաջարկվում է ավելի թեթեւ տուգանք 10 000 դրամի չափով»,-ասաց Դանիելյանը:
Մասնավորապես, խոսքը դիմակ ունենալու պահանջի մասին է: Փոխնախարարը նշեց, որ պարտադիր չէ բաց տարածքում դիմակ կրելը, սակայն քաղաքացիները պետք է դիմակ ունենան:
Նա նաեւ նշեց, որ փակ տարածքում դիմակ չկրելու համար քաղաքացիները եւ տնտեսվարող սուբյեկտները կտուգանվեն 100 000-ից 300 000 դրամի չափով, իսկ ձեռնոց չկրելու հետ կապված որեւէ տուգանք դեռ չի սահմանվի:
