Հայաստանի պետական տնտեսագիտական համալսարանի ռեկտորատը, հաշվի առնելով նոր կորոնավիրուսային համավարակի հետեւանքով երկրում հայտարարված արտակարգ դրությունը եւ դրա բացասական տնտեսական հետեւանքները, ՀՊՏՀ 185 ուսանողների տրամադրել է ուսման վարձի զեղչ 30 տոկոսի չափով:
«Մենք հասկանում ենք, որ կորոնավիրուսի հետեւանքով ստեղծված իրավիճակը սոցիալական դժվարություններ է ստեղծել նաեւ ուսանողների համար: Իհարկե, Հայաստանի Հանրապետության կառավարության կողմից հաստատված կորոնավիրուսի տնտեսական հետեւանքների չեզոքացման 14-րդ միջոցառումն իր օգնությունը բերեց մեր բուհի 335 ուսանողներին, սակայն մեր համալսարանը եւս ցանկացավ անմասն չմնալ եւ հանդես բերել սոցիալական պատասխանատվություն:
Տնտեսագիտական համալսարանն իր հնարավորությունների սահմաններում եւս օգնություն է ցուցաբերում իր ուսանողներին՝ աջակցության հիմքում դնելով նրանց սոցիալական խնդիրները»,- ՀՊՏՀ նախաձեռնությունն այսպես է մեկնաբանել ռեկտորի պաշտոնակատար Դիանա Գալոյանը: