Եվրահանձնաժողովի նախագահ Ուրսուլա ֆոն դեր Լյայենը եւ փոխնախագահ, ԵՄ դիվանագիտության ղեկավար Ժոզեպ Բորելը կոչ են արել ԱՄՆ-ին վերանայել Առողջապահության համաշխարհային կազմակերպության հետ հարաբերությունների խզման մասին որոշումը։ Այս մասին ասվում է նրանց համատեղ հայտարարության մեջ, հայտնում է «ՌԻԱ Նովոստի»-ն։
ԱՄՆ նախագահ Դոնալդ Թրամփը հայտարարել էր, որ երկիրը դադարեցնում է ԱՀԿ-ի հետ հարաբերությունները, քանի որ կազմակերպությունը «հրաժարվել է անցկացնել պահանջվող բարեփոխումները»։ Նրա խոսքերով՝ ԱՄՆ-ը « այդ միջոցները կվերաուղղի ամբողջ աշխարհում առողջապահության հրատապ կարիքները հոգալուն»։
«Մենք կոչ ենք անում ԱՄՆ-ին վերանայել իր հայտարարած որոշումը»,- ասվում է հայտարարության մեջ։
«Այն դեպքում, երբ աշխարհը շարունակում է պայքարել COVID-19 համավարակի դեմ, բոլորի համար գլխավոր խնդիրը կյանքեր փրկելն է, այդ համավարակը զսպելն ու մեղմացնելը։ Եվրոպական միությունը շարունակում է այդ առումով աջակցել ԱՀԿ-ին եւ արդեն լրացուցիչ ֆինանսավորում է հատկացրել»,- նշել է նա։
Համաշխարհային համագործակցությունն ու համերաշխությունը համավարակի դեմ պայքարի միակ արդյունավետ միջոցն է, կարծում են ԵՄ առաջնորդները։
«ԱՀԿ-ն այսուհետ եւս պետք է ի վիճակի լինի ղեկավարել ինչպես այժմյան, այնպես էլ ապագայի համավարակների դեմ պայքարի միջազգային գործողությունները։ Դրա համար անհրաժեշտ է բոլորի մասնակցությունն ու աջակցությունը։ Այս համաշխարհային սպառնալիքի առջեւ եկել է ավելի ամուր համագործակցության եւ համատեղ որոշումների ժամանակը։ Անհրաժեշտ է խուսափել այնպիսի գործողություններից, որոնք թուլացնում են միջազգային ջանքերը»,- հայտարարել են նրանք։