Մենք այս տեսանյութը տեսնում ենք միայն այն պահից, երբ քաղաքացուն փորձում են բերման ենթարկել, չի երեւում, թե ինչ է դրան նախորդել: Այս մասին, այսօր՝ հունիսի 5-ին, ԱԺ-ում ավանդական ճեպազրույցների ժամանակ նշեց «Իմ քայլը» խմբակցության պատգամավոր Գայանե Աբրահամյանը՝ անդրադառնալով համացանցում տարածված տեսանյութին, թե ինչպես են մի քանի ոստիկաններ բերման ենթարկում քաղաքացուն, ենթադրաբար, դիմակ չկրելու համար:
«Քաղաքացին ասում է՝ սպասեք , գալիս եմ: Ենթադրում եմ, որ բերման են ենթարկում: Իսկ բերման ենթարկում են այն իրավիճակում, երբ նախորդել է բացատրական աշխատանք, երեւի դիմակ կրելու պահանջ եւ այդ պահանջը չի կատարվել: Այս բոլորը չի նկարված այս տեսանյութում:
Միայն սա տեսնելով մենք չենք կարող դատողություն անել: Ես կփորձենք ճշտել ողջ իրականությունը, գուցե այդ հատվածում կան տեսխցիկներ: Չեմ բացառում, որ պարզվի, որ քաղաքացին, այո, խախտել է կանոնները, գուցե հայհոյել է, ինչ-որ գործողություններ է իրականացրել, չի ենթարկվել ոստիկանի օրինական պահանջին եւ հաջորդել է բերման ենթարկելու գործողությունը: Իսկ բերման ենթարկելը ամենամեղմ ձեւով չի արվում, եթե մարդն ընդդիմանում է: Բնականաբար, այդ իրավիճակում կիրառվում է համաչափ ուժ: Քաղաքացին ասում ՝ սպաեք, գալիս եմ, չի ասում՝ շունչս կտրվում է, չեմ կարող դիմակ կրել»,-ասաց նա:
