Գերմանիայի կառավարությունը չի տարհանի դեպի հայրենի իր քաղաքացիներին, որոնք արտերկրում հանգիստն անցկացնելու ժամանակ վարակվել են կորոնավիրուսով։ Այդ մասին հայտարարել է Գերմանիայի ԱԳ նախարար Հայկո Մասը Bild am Sonntag թերթին տված հարցազրույցում։
«Ովքեր արձակուրդի ժամանակ վարակվել են կորոնավիրուսով, չեն կարող հույս ունենալ, որ մենք կտեղափոխենք նրանց հետ դեպի Գերմանիա,-ընդգծել է քաղաքական գործիչը։-Իհարկե, ծայրահեղ դեպքերում մեր հյուպատոսությունները պատրաստ կլինեն ցուցաբերել անհրաժեշտ աջակցություն։ Սակայն Գերմանիայի կառավարությունը չի կարողանա եւս մեկ անգամ կազմակերպել ավիաչվերթ հանգստացողներին հայրենիք տեղափոխելու համար»։
Հունիսի 3-ին Մասը հիշեցրել է, որ հունիսի 15-ից Գերմանիայում կչեղարկվի նախազգուշացումը դեպի մի շարք եվրոպական երկրներ ճանապարհորդելու մասին նախազգուշացումը, հաղորդում է DW-ը։
«Մենք ցանկանում ենք հնարավորություն ունենալ հենվել փաստի վրա, որ մեր քաղաքացիները, հաշվի առնելով վիրուսի տարածումը, ճանապարհորդությունների ժամանակ կցուցաբերեն առավելագույն զգուշություն»։
Ընդ որում՝ ԱԳ նախարարը չի պատասխանել հարցին, թե երբ կչեղարկվի ԵՄ սահմաններից դուրս, օրինակ, դեպի Թուրքիա ուղեւորությունների մասին նախազգուշացումը։ «Թուրքիայի կառավարության հետ անցկացվում են բանակցությունները»,-ասել է նա այդ կապակցությամբ՝ հավելելով, որ ամեն ինչ կապված է համաճարակաբանական իրավիճակի զարգացումից։