Եթե նայեք, մենք 44 ապրանքային շուկա ենք ուսումնասիրել. բացի մի քանի ապրանքներից՝ ցիտրուսային մրգեր, կոճապղպեղ (իմբիր) եւ դիմակներ, այլ գնային բարձրացումներ չեն նկատվել այս ժամանակահատվածում: Այս մասին Այսօր՝ հունիսի 8-ին, ԱԺ-ում լրագրողների հետ զրույց նշեց Տնտնեսական մրցակցության պաշտպանության պետական հանձնաժողովի նախագահ Գեղամ Գեւորգյանը:
«Այսինքն բացի դոլարի կուրսի տատանումից եւ ճանապարհածախսի թանկացում, որը շատ փոքր ազդեցություն թողեց, գների էական բարձրացում չի եղել: Առաջին անհրաժեշտության սպառողական ապրանքներում գների նվազում կա: 2018-2019 թվականների համեմատությամբ այդ նվազումը բավականին ակնհայտ է»,-ասաց հանձնաժողովի նախագահը:
Նա ընդգծեց, որ այս պահին որեւէ դեֆիցիտ չկա, որեւէ խանութում դարակների դատարկություն չի եղել. «Միայն կոճապղպեղի դեպքում եղավ, որը հասկանալի է: Կոճապղպեղի սպառումը շատ փոքր քանակի է, բնակչությունը միանգամից մեծ գնում կատարեց եւ այն արագ սպառվեց մինչեւ նոր ներկրում տեղի ունեցավ: Դիմակների դեպքում էլ ամբողջ աշխարհում կար դեֆիցիտ, որովհետեւ այն երկրները, որոնք արտահանում են դիմակներ, չէին արտահանում, քանի որ ներքին սպառման խնդիր ունեին»,-ասաց Գեղամ Գեւորգյանը:
Հարցին, թե հնարավո՞ր է ուսումնասիրեն նաեւ թեստերի շուկան, քանի որ հիմա մասնավոր ընկերությունները եւս թեստավորում են իրականացնում, նա պատասխանեց, որ մինչեւ հիմա թեստավորման գործընթաց իրականացնում էր միայն պետությունը. «Եթե մասնավորները սկսեն թեստավորում իրականացնել եւ անհրաժեշտություն լինի գների վերահսկողություն իրականացնել եկամ չարաշահումների կանխման խնդիրներ լուծել, ապա դրանք անպայման կանենք: Այս պահին նման ազդակ կամ խնդիր չի եղել»:
