Ճգնաժամը դրանով է ճգնաժամ, որ իրար է խառնում մարդկային, ընկերական, պաշտոնական հարաբերություններ: Այս մասին այսօր՝ հունիսի 8-ին, պարետատան նիստից հետո կայացած ճեպազրույցի ժամանակ նշեց ՀՀ վարչապետ Նիկոլ Փաշինյանը՝ անդրադառնալով նրան, որ այսօր պաշտոնանկ է արել ուժային կառույցների ղեկավարների:
Նշենք, որ երեկ ԶՈՒ ԳՇ պետ Արտակ Դավթյանն իր առանձնատանը կազմակերպել է որդու հարսանիքը, որին մասնակցել են տասնյակ մարդիկ:
«Ես ուզում եմ երջանկություն մաղթել բոլոր նորապսակներին, նաեւ գեներալ-լեյտենանտ Արտակ Դավթյանի որդուն ու հարսին, հույս ունենալ, որ երջանիկ ընտանիք կձեւավորեն:
Այո, ճգնաժամային իրավիճակներում որոշումները միանշանակ չեն լինում, բայց գալիս, հասնում է մի գիծ, երբ կարգապահությունը, կարգուկանոնը արտակարգ դրության եւ երկրի ղեկավարի ասածներից բխող գործողությունների ճշգրիտ եւ անվերապահ կատարումը դառնում է անհրաժեշտություն:
Ես իհարկե, ցավում եմ նման զարգացումների համար, բայց կարծում եմ, որ այս իրավիճակում երկրի անվտանգության շահը, պետական կառավարման որակի եւ կարգապահության շահը պահանջում է կայացնել այսպիսի որոշումներ:
Ուզում եմ հստակ արձանագրել, եւ այսօր էլ խորհրդակցության ժամանակ ասել եմ, որ առավել եւս պետական կառավարման մարմինները, առավել եւս պետական կառավարման եւ ՏԻՄ բոլոր մարմինները պետք է սեփական օրինակով ի ցույց դնեն ծայրաստիճան եւ անվերապահ կարգապահություն»,-ասաց նա:
Ինչ վերաբերում է պաշտոնանկ արված պաշտոնյաներին, վարչապետն ասաց. «Ես ասել եմ, որ չեմ կարծում, թե ՀՀ-ին եւ հայ ժողովրդին ծառայություններ մատուցելու նրանց պոտենցիալը սպառված է եւ մենք ըստ իրավիճակի հնարավոր եմ համարում, որ քննարկենք նաեւ հետագա ծառայությունների հարցը»: