Ռուսաստանի եւ Թուրքիայի արտգործնախարարներ Սերգեյ Լավրովն ու Մեւլութ Չավուշօղլուն երկուշաբթի օրը քննարկել են տարբեր ոլորտներում երկու երկրների փոխգործակցությունը՝ աշխարհում կորոնավիրուսով վարակվածների թվի նվազման պայմաններում։ Այս մասին ասվում է կողմերի միջեւ հեռախոսազրույցի արդյունքում ՌԴ ԱԳՆ հաղորդագրության մեջ։
«Կողմերը մանրամասն քննարկել են տարբեր ոլորտներում երկու երկրների միջեւ փոխգործակցության հեռանկարները` աշխարհում կորոնավիրուսային վարակով հիվանդացության դեպքերի աստիճանական նվազման պայմաններում: Պայմանավորվել են պահպանել սերտ համակարգումը երկկողմ համագործակցության փուլային վերականգնման գործընթացում»,- ասել են դիվանագիտական գերատեսչությունում:
Նախարարները նաեւ կարծիքներ են փոխանակել Մերձավոր Արեւելքում ընթացիկ իրադարձությունների վերաբերյալ: «Սիրիայի իրավիճակի հետ կապված՝ վերլուծվել է իդլիբյան դեսկալացիայի գոտու հարցով ռուս-թուրքական համաձայնագրերի կատարման ընթացքը»,- ասվում է հաղորդագրության մեջ։
Երկու երկրների արտգործնախարարները քննարկել են նաեւ լիբիական կարգավորումը: «Հաստատվել է Լիբիայի հակամարտող կողմերի հաշտեցման համար պայմաններ ստեղծելու փոխադարձ տրամադրվածությունը՝ ՄԱԿ-ի հովանու ներքո քաղաքական եւ դիվանագիտական կարգավորման օգտին: Հաստատվել է Լիբիայում ՄԱԿ գլխավոր քարտուղարի նոր հատուկ ներկայացուցչի արագ նշանակման անհրաժեշտությունը»,- նշել է ՌԴ ԱԳՆ-ը:
Ռուսաստանի ԱԳՆ-ում հաղորդել են, որ նախարարները կողմ են արտահայտվել պաղեստինա-իսրայելական կարգավորման հարցում փակուղու արագ հաղթահարմանը՝ «կողմերի միջեւ ուղիղ բանակցությունների միջոցով՝ միջազգային միջնորդների «քառյակի», Արաբական պետությունների լիգայի եւ Իսլամական համագործակցության կազմակերպության աջակցությամբ»: