Ես կարծում եմ՝ այսօրվա իրավիճակի եւ արված քայլերի վերաբերյալ գնահատականներ տալու համար պետք է ժամանակ անցնի: Այս մասին, այսօր՝ հունիսի 11-ին, լրագրողների հետ զրույցում նշեց ՀՀ փոխվարչապետ Մհեր Գրիգորյանը:
«Նման մոտեցում ունեմ ոչ միայն ես, այլ եթե ուշադիր եք եղել, շատ զարգացած երկրներ խոսում են այն մասին, որ այդ թվում միջոցառումների եւ կարանտինի արդյունքների մասով գնահատականներ պետք է տալ ժամանակ անց:
Իսկ դուք գիտե՞ք, որ կա փորձագիտական թեզ, որ օրինակ, կոշտ կարանտինը, այո, ինչ-որ դիսկրետի իմաստով, ինչ-որ ժամանակահատվածում տալիս է դրական արդյունքներ, բայց այդ կարանտինը դադարեցնելուց հետո իր հետեւանքները շատ ավելի ծանր են լինում: Ես չեմ կարող ասել, որ դա այդպես է, թե ոչ, բայց կարող եմ ասել, որ այդպիսի փորձագիտական եզրահանգում էլ կա: Դրա համար մինչեւ մենք առնվազն պանդեմիայի երեւույթը չչեզոքացնենք, խորհուրդ չեմ տալիս գնահատականներ տալ: Այդ գնահատականները լիարժեք չեն լինի»,-ընդգծեց փոխվարչապետը:
Հարցին, թե կառավարությունը չի՞ ցանկանում հանձնաժողով ստեղծել այս իրավիճակի պատճառները հասկանալու համար, նա պատասխանեց. «Հանձնաժողովը գործընթացի իրականացման ձեւ է, ես խոսում եմ տրամաբանության մասին: Իահրեկ, պետք է հասկանալ գոնե ապագայի, գոնե սերունդների համար, թե ին է սա նշանակում եւ ինչպես է պետք դրա դեմ պայքարել: Բայց դա պետք է անել, կամ պետք է խոսել դրա մասին ոչ թե այն ժամանակ, երբ պանդեմիան դեռեւս առկա է, այլ երբ այն վերացված է: Երբ դա կվերանա, ես վստահ եմ, որ կվերանա, այդ ժամանակ ճիշտ կլինի խոսել պատճառների մասին եւ քայլերի մասին, որոնք դրական են ազդել, թե բացասական: Այդ գնահատականը ոչ դուք, ոչ ես, անգամ փոփրձագետները չեն կարողանում տալ:
Արդյունավետության գնահատականը կարելի է տալ միայն այն ժամանակ, երբ արձանագրվի, որ դա վերացել է: Ընդ որում, ոչ մի տեղ չի վերացել: Հիմա ո՞ր երկրի հետ եք ուզում համեմատել, որ մենք գնահատենք արդյունավետությունը»:
