Մարդու իրավունքները շատ կարեւոր են, սակայն նույնիսկ միջազգային փաստաթղթերում արտակարգ իրավիճակների կամ պատերազմի ժամանակ դրանց սահմանափակում է ենթադրվում: Այս մասին «Քաղտնտեսություն» ինստիտուտի կազմակերպված քննարկմանն ասաց Հելսինկյան կոմիտեի ղեկավար Ավետիք Իշխանյանը:
Ըստ նրա՝ հարցն այն է, թե որքանով են դրանք համաչափ են եւ արդյոք կա խտրականություն առանձին խմբերի նկատմամբ: «Հայաստանում չեղարկել են բոլոր սահմանափակումները, բացի դիմակներից: Եվ մնում է միայն ամենակարեւոր սահմանափակումը՝ խաղաղ հավաքներ անցկացնելու սահմանափակումը: Այս իրավունքը մարդու ամենակարեւոր իրավունքներից մեկն է համարվում: Քանի որ այն ներառում է խոսքի ազատության եւ բողոքների արտահայտման իրավունքը: Սակայն մեզ մոտ իրավիճակը բռնաճնշումների է վերածվել: Ստացվում է, որ իշխանությունները կարող են ձերբակալել, անել ինչ ուզում են, իսկ դուք իրավունք չունեք վրդովվել»,- ասաց իրավապաշտպանը:
Այս կապակցությամբ նա շեշտեց, որ հավաքը մեկից ավել մարդու մասնակցություն է նշանակում: Մեկ մարդը հավաք չէ: «Իսկ մեզ մոտ նման ակցիաներն «արգելված հավաք» են անվանել եւ բերման են ենթարկել: Ես առնվազն երեք նման դեպք գիտեմ: Մարդկանց, ովքեր գտնվում էին Սիրահարների այգում, բերման են ենթարկել: Այդպես մեզ էլ կարող են բերման ենթարկել»,- ասաց իրավապաշտպանը:
Ավետիք Իշխանյանն ընթերցեց ՄԱԿ-ի Հավաքների ազատության հարցերով հանձնակատարի զեկույցը եւ զուգահեռներ անցկացրեց Հայաստանի հետ: «Իմ կարծիքով՝ երբ ոստիկանությունը միջամտում է հավաքներին, այդպիսով սրում է իրավիճակը կորոնավիրուսի տարածման հետ կապված: Այդպես, մարդիկ միմյանցից հեռավորության վրա ակցիա են իրականացնում: Ոստիկանական միջամտությունը միայն սրում է իրավիճակը»,- ասաց իրավապաշտպանը:
Միեւնույն ժամանակ, նա նշեց, որ իշխանությունները, բարեբախտաբար, ապօրինի հանրաքվեն ապօրինի կերպով չեղյալ հայտարարեցին: Եթե չչեղարկեին, ստիպված կլինեին կեղծել: Ինչ վերաբերում է իշխանությունների սահմանած տուգանքներին պարետի հայտարարած միջոցների խախտման համար, ապա իրավապաշտպանը կարծում է, որ դրանք չափազանց բարձր են:
