2020-ին ճանապարհորդելու ամենաանվտանգ ուղղություն է համարվում Վիետնամը։ Independent-ին հղում անելով, Lenta-ն հրապարակել է համավարակն ամենահաջող հաղթահարած եւ, հետեւաբար, ճանապարհորդությունների համար նախընտրելի վայրերի ամբողջական վարկանիշը։

Լրագրողների տվյալներով՝ վարակի տարածման ամբողջ ընթացքում Վիետնամում գրանցվել է վարակի ընդամենը 342 դեպք եւ ոչ մի մահ։ Նյութի հեղինակների կարծիքով՝ դրան նպաստել են իշխանությունների օպերատիվ արձագանքը եւ կորոնավիրուսի զսպման խիստ միջոցառումները։

Անվտանգ երկրների ցանկում երկրորդը Հունաստանն է, քանի որ, ըստ հեղինակների, այնտեղ նույնպես հաջողվել է կանխել վարակի տարածումը։

Վարկանշային ցուցակում ընդգրկվել են նաեւ Հոնկոնգը, որի իշխանությունները ներդրել են շնչառական դիմակներ կրելու կանոնը ու սահմանափակել են ուղեւորությունները դեպի Չինաստան, եւ Իսլանդիան, որի բնակչությունը մեծաքանակ թեսթավորումների է ենթարկվել։

Բացի այդ, Independent-ի խմբագիրները այցելելու համար խորհուրդ տրվող վայրերից նշել են Նոր Զելանդիան եւ Տրինիդադ ու Տոբագո կղզի-պետությունը։