Երեկ Հայաստանի Հանրապետությունում գրանցվեց հերթական աննախադեպ իրադարձությունը՝ հակաիրավական եղանակով փոփոխության ենթարկվեց մեր երկրի բարձրագույն օրենքը՝ Սահմանադրությունը՝ գործընթացը զուգորդելով Քրեական օրենսգրքով նախատեսված արարքների առերեւույթ հատկանիշներով։ Այս մասին Facebook-ի իր էջում գրել է սահմանադրագետ Գոհար Մելոյանը:
Նա, մասնավորապես, նշել է. «Այս ապօրինի գործընթացի սցենարը կանխատեսելի էր դեռեւս հունվար ամսին, երբ նույնաբնույթ եղանակով իշխող ուժը փորձում էր այն կյանքի կոչել, սակայն քննադատությունների արդյունքում որոշեց պատասխանատվության բեռը տեղափոխել հանրության դաշտ, եւ հակաիրավական եղանակով նշանակվեց հանրաքվե։
Զարգացումների արդյունքում, հաշվի առնելով վարկանիշային անկումը եւ հաշվի չառնելով նոր կորոնավիրուս վարակի դեմ ձախողված պայքարը, երկրում տիրող ծանր բարոյահոգեբանական եւ սոցիալ-տնտեսական իրավիճակը՝ ամեն դեպքում իշխող ուժը կյանքի կոչեց նույն վերջնանպատակով նախնական սցենարը՝ միանձնյա մեկ օրվա ընթացքում փոփոխելով երկրի Սահմանադրությունը, բացահայտորեն ոտնահարելով իշխանության տարանջատման սկզբունքը, շրջանցելով զսպող ու հակակշռող գործառույթ կատարող սահմանադրական մարմիններին՝ Սահմանադրական դատարանին, Հանրապետության նախագահին, ընդդիմադիր խմբակցություններին»:
