Օրենսդրական նախաձեռնությունը կարգավորումներ է առաջարկում՝ Սահմանադրական դատարանի թափուր դատավորների թեկնածուների հաջորդականությունը որոշելու համար․ Սահմանադրական դատարանի դատավորների նոր թեկնածուներին կառաջադրեն կառավարությունը, նախագահը եւ Դատավորների ընդհանուր ժողովը: Այս մասին ՀՀ Ազգային ժողովի արտահերթ նստաշրջանում «Սահմանադրական դատարանի մասին» սահմանադրական օրենքում եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթի արագացված եւ երկրորդ ընթերցմամբ քննարկմանն ասաց նախագծի հեղինակ,«Իմ քայլը» դաշինքից ԱԺ պատգամավոր Սուրեն Գրիգորյանը։ Ընդ որում, կառավարությանը, նախագահին եւ Դատավորների ընդհանուր ժողովին մինչեւ երկու ամիս ժամանակ է տրվում դրա համար։
Բացի այդ, օրենսդրական այս նախաձեռնությունը նպատակ ունի պարզաբանել Սահմանադրության փոփոխությունների արդյունքում Սահմանադրական դատարանի՝ թոշակի անցած դատավորների կենսաթոշակային իրավունքի իրականացումը:
Որոշվում է նաեւ Սահմանադրական դատարանի նախագահի պաշտոնի թափուր տեղը լրացնելու հարցը: Սահմանադրության 213-րդ փոփոխված հոդվածը սահմանում է, որ Սահմանադրական դատարանի նախագահը պետք է ընտրվի թափուր տեղերը լրացնելուց հետո, բայց այս դեպքում կոնկրետ ժամկետ նշված չէ, իսկ արդեն անցումային դրույթներում հստակ սահմանված է, որ նոր նախագահը պետք է ընտրվի 10 օրվա ընթացքում:
Այս օրենսդրական նախաձեռնության՝ երկրորդ ընթերցմամբ քննարկման ընթացքում պետաիրավական հարցերի մշտական հանձնաժողովի նիստին օրենսդրական փաթեթի հեղինակները տեխնիկական բնույթի երկու փոփոխություն են կատարել:
Միեւնույն ժամանակ, իշխանությունների հավաստմամբ, Սահմանադրության մեջ փոփոխությունների՝ ուժի մեջ մտնելուց առաջ նույնիսկ այս օրենսդրական նախաձեռնությունը չէր կարող հայտնվել, քանի որ «Սահմանադրական դատարանի մասին» օրենքի 88-րդ հոդվածի անցումային դրույթները հիմնված են Սահմանադրության 213-րդ հոդվածի հին տարբերակի վրա: Այսինքն, քանի դեռ այս հրատարակությունը չի փոխվել, ոչ ոք «Սահմանադրական դատարանի մասին» օրենքը փոփոխելու իրավունք չուներ: Օրենսդրական փաթեթի հեղինակները նշում են, որ միայն այդ փոփոխություններից հետո կարելի էր փոփոխություններ մտցնել «Սահմանադրական դատարանի մասին» օրենքում:
Իշխող դաշինքից պատգամավորների խոսքով՝ անկախ այս փոփոխություններից, Սահմանադրական դատարանի նախագահ Հրայր Թովմասյանը հունիսի 26-ից արդեն կորցրել է իր պաշտոնը՝ մնալով դատավորի կարգավիճակում, իսկ Ալվինա Գյուլումյանը, Ֆելիքս Թոխյանը եւ Հրանտ Նազարյանը, ովքեր 12 տարի զբաղեցնում էին ՍԴ դատավորի պաշտոններ, թողել են իրենց պաշտոնները։
Երկրում իշխող քաղաքական ուժը կարծում է նաեւ, որ այս պահին ՍԴ նախագահի պարտականությունները կատարում է դատավոր Աշոտ Խաչատրյանը, ով ներկայումս տարիքով ամենամեծ դատավորն է: Սակայն ՍԴ-ի ապարատում ավելի վաղ հայտարարեցին ահակառակի մասին։ Նրանց կարծիքով՝ Հրայր Թովմասյանը շարունակում է մնալ Սահմանադրական դատարանի նախագահ, քանի որ արձակուրդում է, իսկ նրա տեղակալ Ալվինա Գյուլումյանը փոխարինում է նրան: Գյուլումյանն ինքը եւս համոզված է, որ միայն սահմանադրական փոփոխություններով անհնար է դադարեցնել իր եւ իր գործընկերների լիազորությունները:
Նշենք, որ Սահմանադրության փոփոխությունները հապճեպ ընդունելուց հետո ակնհայտ դարձավ, որ իշխանությունները «մոռացել են» իրենց հարմար ձեւով «փոփոխել» «Սահմանադրական դատարանի մասին» օրենքը: Այս մասին ասե են նաեւ Սահմանադրական դատարանի մի քանի դատավոր, փաստաբաններ եւ ընդդիմությունը: Այժմ իշխանությունները մտադիր են շտկել իրավիճակը, ինչի համար նրանք կրկին խորհրդարանի արտահերթ նստաշրջան են գումարել, որը բոյկոտվում է «Բարգավաճ Հայաստան» եւ «Լուսավոր Հայաստան» կուսակցությունների խմբակցությունների կողմից: