COVID-19-ի զոհերի թիվը Լատինական Ամերիկայի երկրներում մինչեւ հոկտեմբեր կարող է հասնել 438 000-ի, եթե չընդունվեն կանխարգելման միջոցներ, հայտարարել է Հյուսիսային եւ Հարավային Ամերիկայի ԱՀԿ տարածքային տնօրեն Կարիսա Էթյենը։
Reuters-ի տվյալներով՝ Լատինական Ամերիկայում մահացածների թիվը հասել է 113 844-ի, ինչը կազմում է աշխարհում մահացածների թվի մոտ 1/5-ը։
ԱՀԿ ներկայացուցիչը հայտարարել է, որ Ամերիկան է կորոնավիրուսի համավարակի համաշխարհային էպիկենտրոնը, եւ մինչեւ հոկտեմբերի 1-ը ողջ տարածաշրջանի համար զոհերի թիվը կարող է գրեթե եռապատկվել՝ հասնելով 637 000-ի, չնայած նա նախազգուշացրել է, որ մաթեմատիկական մոդելի կանխատեսումները չպետք է ընդունել բառացիորեն, այլ միայն որպես պլանավորման ուղեցույց:
Ըստ Էթյենի՝ ԱՄՆ-ում Վաշինգտոն եւ Նյու Յորք նահանգներում շատ քիչ է մահացության նոր դեպքերի թիվը, սակայն 27 այլ նահանգներում նկատվում է էքսպոնենտալ աճ:
Կարիբյան մի քանի երկրներ եւ տարածքներ կարողացել են լիովին զսպել վիրուսը եւ չեն հաղորդել հիվանդության նոր դեպքերի մասին, բայց նրանք պետք է զգոն լինեն մի քանի ամիս, ասել է Էթյենը: