Կորոնավիրուսի պանդեմիան կենսաբանական պատերազմի փորձ է եւ ստուգում հայրենական առողջապահական համակարգի համար: Այս մասին Forbes-ին տված հարցազրույցում ասել է Ազգային բժշկական պալատի ղեկավար, Համառուսական ազգային ճակատի կենտրոնական շտաբի համանախագահ, բժիշկ Լեոնիդ Ռոշալը:
«Երբ ես վերլուծում եմ ստեղծված իրավիճակը, հասկանում եմ, որ դա կենսաբանական պատերազմի փորձ է: Ես չեմ ասում, որ այդ վիրուսը մարդն է ստեղծել. նման պնդումների համար բավարար հիմքեր չկան, ես վիրուսաբան չեմ: Սակայն սա ստուգում է առողջապահական համակարգի համար»,-նշել է նա:
Ռոշալը բարձր է գնահատել ՌԴ նախագահի, կառավարության, առողջապահության նախարարության եւ այլ մարմինների կողմից ձեռնարկվող միջոցները:
«Որոշումներ կայացնելիս հաշվի է առնվել այլ երկրների փորձը: Կորոնավիրուսով վարակված պացիենտներին բուժօգնության ցուցաբերման որակի մասին կարելի է դատել ապաքինվածների թվով, որոնց թիվն անշեղորեն աճում են»,-հավելել է նա:
Ռոշալի կարծիքով՝ Ռուսաստանին հաջողվել է խուսափել պանդեմիայի ծանր հետեւանքներից բնակչության ոչ մեծ խտության շնորհիվ: «Ես արդեն ասել եմ, որ պանդեմիայի տարածման համար կարեւոր է նաեւ բնակչության խտությունը: Խիտ բնակեցված են միայն Մոսկվան եւ Մոսկվայի շրջանը: Իսկ ընդհանուր առմամբ ՌԴ տարածքը հսկայական է: Մեր երկրում կորոնավիրուսից մահվան դեպքերը քիչ են, ինչին հաջողվել է հասնել սանիտարական կորդոնների ներդրման, մուտքի արգելքի սահմանափակման եւ ներքին հսկողության միջոցների շնորհիվ»,-հավելել է նա: