«Միասին մենք կարող ենք» միջոցառման շրջանակում «Թովմասյան» հիմնադրամի նպատակներից մեկն ամբողջությամբ իրականացվել է: Այս մասին ամփոփիչ մամուլի ասուլիսի ժամանակ հայտարարեց «Թովմասյան» բարեգործական հիմնադրամի հոգաբարձուների խորհրդի նախագահ Արտակ Թովմասյանը:
Նա հիշեցրեց, որ մայիսի 2-ին տրվել է մասշտաբային համահայկական ծրագրի մեկնարկը, որի բոլոր միջոցներն ուղղվել են Հայաստանում կորոնավիրուսով վարակվածների բուժման ծրագրի իրականացմանը, ինչպես նաեւ սարքավորումների եւ դեղամիջոցների գնմանը:
Նրա խոսքով՝ նախաձեռնությանը մասնակցել են 4 մայրցամաքներից 120 հայ գործիչներ:
«Այսօր մենք հավաքվել ենք, որպեսզի ֆիքսենք այն փաստը, որ 5 նպատակներից մեկն իրականացել, մենք լիովին բավարարել ենք բոլոր հայտերը 2500 ստացված նվիրատվությունների շնորհիվ: Մենք միասին կարողացանք սարքավորումներով եւ անհրաժեշտ իրերով ապահովել Հայաստանի եւ Ղարաբաղի սահմանամերձ հիվանդանոցներին: Ծրագրի մեկնարկի մասին որոշումն ընդունվել է ապրիլի 3-ին, երբ գրանցվեց վարակման ընդամենը 736 դեպք, 7 մահ եւ 34 նոր դեպք: Մայիսի 2-ին, երբ մեկնարկեց համերգը, դեպքերի թվիը հասավ 2148-ի: Հունիսի 3-ին, այսինքն՝ առնվազն 40 օր հետո, օգնություն տրամադրեցինք Վանաձորի հիվանդանոցին: Այդ օրերին գրանցվեց 16 000 դեպք: Այսօր դեպքերը հասնում են 39 000-ի: Այս դինամիկան ցույց է տալիս մեր միջոցառումների ակտուալությունը»,-նշեց Թովմասյանը:
Նա հստակեցրեց, որ այլ նպատակների թվում է մարդկանց սոցիալական հեռավորություն պահելու մշակույթի մասին տեղեկացնելը, եւ հենց այդ սկզբունքով համերգ կազմակերպվեց: «Բացի այդ, պետք է միասնական լինել եւ ցույց տալ, որ այս պայմաններում մենք կարող ենք համախմբվել: Կարեւոր է նաեւ ցույց տալ, որ յուրաքանչյուրն իր հնարավորությունների սահմաններում կարող է օգնել: Դա սոցիալական պատասխանատվության օրինակ է»,-նշեց նա:
Նրա խոսքով՝ կարեւոր չէ, թե ում է պատկանում այս կամ այն բժշկական հաստատությունը՝ առողջապահության նախարարությանը, այլ գերատեսչության կամ սուբյեկտի, կարեւոր է աջակցությունը, եւ դա պետք է հետեւողական բնույթ կրի:
«Ինչ վերաբերում է հնարավոր երկրորդ ալիքին, որը սպասվում է աշնանը, ապա դրա մասին կարելի էր խոսել, եթե ավարտվեր առաջին ալիքը: Կարելի է ասել, որ մենք անցնում ենք առաջին ալիքի տարբեր փուլեր»,-հավելեց Արտակ Թովմասյանը:
Նա պարզաբանեց, որ Հիմնադրամը սովորաբար զբաղվում է գիտության, կրթության եւ սպորտի հարցերով, այդ պատճառով բժշկությունը սկզբնապես ներառված չէր ծրագրերում, եւ որոշումն ընդունվեց՝ ելնելով իրավիճակից:
«Մենք նաեւ շատ հայտեր ենք ստանում՝ կապված սոցիալական ոլորտում խնդիրների հետ, այդ պատճառով որոշում ընդունվեց նման խնդիրների լուծման կենտրոն բացել, որը իրավաբանական եւ խորհրդատվական օգնություն կտրամադրի»,-եզրափակեց Արտակ Թովմասյանը: