«Կորոնավիրուսը կարելի էր ավելի արագ արմատախիլ անել, եթե այն հայտնվեր ժողովրդավարական Թայվանում, այլ ոչ թե ավտոկրատական Չինաստանում»: Այս մասին Թայբեյ կատարած այցի ընթացքում հայտարարել է ԱՄՆ առողջապահության նախարար Ալեքս Ազարը, հայտնում է AFP-ը:
«Չինական Կոմունիստական կուսակցությունը հնարավորություն ուներ նախազգուշացնել աշխարհին եւ աշխատել աշխարհի հետ` պայքարելու վիրուսի դեմ: Բայց նրանք նախընտրեցին դա չանել, եւ այդ ընտրության արժեքն օրեցօր ավելանում է »,- հանրային առողջապահության քոլեջում ունեցած ելույթում ասել է Ազարը: «Կարծում եմ, թե չափազանցություն չէ ասել, որ եթե այս վիրուսը հայտնվեր Թայվանի կամ Միացյալ Նահանգների նման մի վայրում, ապա դա հնարավոր կլիներ հեշտությամբ արմատախիլ անել»,- հավելել է նա: Փոխարենը, Պեկինը կարծես թե դիմադրում էր տեղեկատվության փոխանակմանը, փակում էր բժիշկների բերանը եւ սահմանափակում էր աշխարհի արձագանքելու կարողությունը:
Երեքշաբթի օրը նա հազվադեպ հանդիպում է ունեցել Թայվանի արտգործնախարար Ջոզեֆ Վուի հետ, ով ասել է, որ Թայվանն ապրում է այն վախով, որ Չինաստանը մի օր ազատությունից կզրկի իրեն:
«Մեր կյանքը ավելի ու ավելի է բարդանում, քանի որ Չինաստանը շարունակում է ճնշում գործադրել Թայվանի վրա՝ ստիպելով ընդունել իր քաղաքական պայմանները, որոնք Թայվանը կվերածեն հաջորդ Հոնկոնգի»,- ասել է Վուն:
