ԱՄՆ գլխավոր ինֆեկցիոնիստ դոկտոր Էնթոնի Ֆաուչին հայտարարել է, որ «լուրջ կասկածներ» ունի COVID-19-ի դեմ ռուսական պատվաստանյութի անվտանգության եւ արդյունավետության հետ կապված, հայտնում է ABC- ն:
Ալերգիկ եւ վարակիչ հիվանդությունների ազգային ինստիտուտի տնօրենն այս թեմայի վերաբերյալ բացառիկ մեկնաբանություն է տվել National Geographic-ին վիրտուալ ձեւաչափով քննարկման ժամանակ:
«Հուսով եմ, որ ռուսներն իսկապես ապացուցել են, որ պատվաստանյութն անվտանգ եւ արդյունավետ է: Ես լուրջ կասկածներ ունեմ առ այն, որ նրանք դա արել են»,- ասել է Ֆաուչին:
Ընդ որում, նա պարզաբանել է, որ «պատվաստանյութ ունենալը եւ դրա արդյունավետությունն ու անվտանգությունն ապացուցելը երկու տարբեր բաներ են»:
ԱՄՆ գլխավոր ինֆեկցիոնիստը հավելել է, որ ԱՄՆ-ն առնվազն տասը պատվաստանյութ է մշակում:
«Եթե մենք ցանկանայինք ռիսկի դիմել եւ վնասել շատ մարդկանց կամ նրանց տալ մի բան, ինչը չի աշխատում, մենք դա կսկսեինք անել հաջորդ շաբաթվանից, եթե ցանկանայինք: Բայց դա այդպես չի աշխատում»,- հավելել է նա:
Ավելի վաղ Ռուսաստանը հայտարարել էր, որ առաջինն աշխարհում պատվաստանյութ է գրանցել կորոնավիրուսի դեմ: Այն ստացել է Sputnik V անվանումը: