Հայաստանի ԱԳ փոխ նախարար Արման Կիրակոսյանն այսօր` մայիսի 17-ին ընդունել է ՄԱԿ-ի Փախստականների հարցերով գերագույն հանձնակատար Անտոնիո Գուտերեշին, ով Հայաստան է ժամանել մասնակցելու Երեւանում կայանալիք դոնորների միջազգային համաժողովի աշխատանքներին:
ԱԳՆ մամուլի ծառայությունից NEWS.am-ին հայտնում են, որ Գերագույն հանձնակատարը նշել է, որ Հայաստանը, լինելով ՄԱԿ-ի փախստականների կարգավիճակի եւ անքաղաքացիության կրճատման մասին կոնվենցիաների անդամ, պետք է հետագայում եւս շարունակի ապահովել նշված փաստաթղթերի դրույթների իրականացումը: Այս առումով նա կարեւորել է այս տարվա վերջում ՄԱԿ-ի կողմից Ժնեւում կազմակերպվելիք նախարարական համաժողովը, որը նվիրված կլինի նշված կոնվենցիաների հոբելյաններին:
Հանձնակատարը նշել է, որ Հայաստանը` լինելով եվրոպական արժեքների կրող երկիր, առաջնորդվում է այս չափանիշներով նաեւ իր երկրի ապաստանի համակարգի կատարելագործման հարցում:
Այնուհետեւ պարոն Կիրակոսյանը հակիրճ ներկայացրել է իրավիճակը տարածաշրջանում, մասնավորապես անդրադառնալով հարեւան երկրների հետ Հայաստանի հարաբերություններին:
Զրույցի ավարտին պարոն Գուտերեշն անդրադարձել է ՄԱԿ-ի Փախստականների հարցերով գրասենյակի ուշադրության կենտրոնում գտնվող` աշխարհի մի շարք թեժ կետերի խնդիրներին:
