Ռուսաստանը չի ընդունում Իրանի հարցով ԱՄՆ պետքարտուղար Մայք Պոմպեոյի ծանուցումը, որը, ինչպես սպասվում է, նա կփոխանցի ՄԱԿ Անվտանգության խորհրդի նախագահին՝ որպես Թեհրանի դեմ պատժամիջոցների վերսկսման գործընթացի սկիզբ, հայտարարել է ՄԱԿ-ում Ռուսաստանի մշտական ներկայացուցիչ Վասիլի Նեբենզյան, հայտնում է «ՌԻԱ Նովոստի»-ն:
Հինգշաբթի օրը Պոմպեոն հանդիպումներ կունենա ՄԱԿ գլխավոր քարտուղարի եւ Անվտանգության խորհրդի նախագահի հետ, եւ ակնկալվում է, որ Անվտանգության խորհրդին կներկայացնի բողոք այն մասին, որ Իրանը չի կատարում ՀՀԳԾ-ի դրույթները եւ նրա դեմ պատժամիջոցները պետք է վերականգնվեն 2231 բանաձեւով։
«Նա չի սկսի (Իրանի դեմ պատժամիջոցների վերականգնման գործընթացը): Սա պատժամիջոցների վերականգնման մեկնարկ չէ: Պատժամիջոցները կարող են վերականգնվել մի պետության կողմից, որը ՀՀԳԾ-ի մասնակից է: ԱՄՆ-ը մասնակից չէ, քանի որ դուրս է եկել ծրագրից: Սա հարց է, որ Անվտանգության խորհրդում ցանկացած պատվիրակություն անխուսափելիորեն կբարձրացնի»,- լրագրողներին ասել է Նեբենզյան: «Մենք չենք ընդունի որպես պատժամիջոցների վերականգնում այն, ինչի մասին նրանք, հավանաբար, կծանուցեն ՄԱԿ Անվտանգության խորհրդի նախագահին եւ գլխավոր քարտուղարին»,- հավելել է մշտական ներկայացուցիչը:
2231 բանաձեւը, որն ընդունվել է 2015 թվականին, պարունակում է Իրանի դեմ ՄԱԿ-ի պատժամիջոցների ավտոմատ վերականգնման մեխանիզմ, եթե երկիրը չի կատարում ՀՀԳԾ-ի շրջանակներում ստանձնած իր պարտավորությունները: Այս մեխանիզմը գործում է 10 տարվա ընթացքում՝ 2015 թվականից: Բանաձեւը ենթադրում է, որ եթե այդ ժամանակահատվածում հայտնաբերվեն Իրանի կողմից որեւէ լուրջ խախտումներ, ապա երկիրը կկարողանա խուսափել պատժամիջոցներից միայն այն դեպքում, եթե ընդունվի ՄԱԿ Անվտանգության խորհրդի համապատասխան բանաձեւ: Իսկ եթե մշտական անդամներից գոնե մեկը դեմ արտահայտվի դրան, պատժամիջոցները ինքնաբերաբար կվերականգնվեն 30 օրվա ընթացքում:
