Ռուսաստանը Հայաստանի առաջատար գործընկերն է ռազմատեխնիկական համագործակցության ոլորտում, եւ որոշ ուղղություններում՝ միակը։ Այս մասին հայտարարել է Հայաստանի պաշտպանության նախարար Դավիթ Տոնոյանը «Բանակ-2020» համաժողովի շրջանակում, հայտնում է «Զվեզդան»։
Նախարարը նշել է, թե առաջին տարին չէ, որ Հայաստանը մասնակցում է ցուցահանդեսին եւ համաժողովին, մասնակցությանը մեծ կարեւորություն է տալիս։ «Ամեն տարի ստորագրվում են նոր պայմանագրեր։ Շատ լավ դինամիկա է, որը երկար տարիներ չէր եղել»,- արձանագրել է Տոնոյանը։
Պաշտպանական գերատեսչության ղեկավարը նշել է, որ Հայաստանը Ռուսաստանի Դաշնության սպառազինության մեջ գտնվող ժամանակակից, արդիականացված զենք եւ տեխնիկա է գնում։ «Հայկական եւ ռուսական մասնավոր ընկերությունները ռազմական արդյունաբերության ոլորտում կնքել են բազմաթիվ պայմանագրեր, եւ հիմնականում դա Հայաստանի տարածքում համատեղ արտադրանքն է։ Ինչպես նաեւ մինչեւ համապատասխան մակարդակ «Սու 25»-ի արդիականացումը, որը թույլ կտա «Սու 25»-ն օգտագործել ավելի ժամանակակից մարտում»,- հայտարարել է պաշտպանության նախարարը։
Պարբերականի փոխանցմամբ՝ նախարարը շեշտել է, որ Հայաստանի եւ Ռուսաստանի ռազմատեխնիկական համագործակցության մակարդակին ոչ մի պետություն չի կարող համեմատվել։ Տոնոյանն անկեղծ շնորհակալություն է հայտնել կորոնավիրուսի դեմ պայքարում ռուսական կողմի օգնության համար։ Անդրադարձ է կատարվել նաեւ ռազմական կրթության ոլորտում երկու երկրների համագործակցության հարցին։ Հանրապետությունն ամեն տարի Ռուսաստանի բարձրագույն ուսումնական հաստատություններ է ուղարկում կուրսանտների եւ սպաների՝ ուսանելու եւ մասնագիտական վերապատրաստման համար, հայտարարել է Դավիթ Տոնոյանը։
2015 թվականին Հայրենական մեծ պատերազմում Հաղթանակի 70-ամյակի պատվին պաշտպանության նախարարությունն անցկացրել էր «Հաղթանակի ժառանգորդ» խոշորածավալ ռազմամարզական համաժողովը, որին մասնակցել էին հետխորհրդային տարածքի բոլորն երկրները՝ ավելի քան 500 մարդ ընդհանուր թվաքանակով։ Նախարարը չի բացառել այս տարի Հաղթանակի 75-ամյակի պատվին Հայաստանում նման մակարդակի միջոցառման անցկացման հնարավորությունը։