Եվրամիության երկրները, Միացյալ Թագավորությունը եւ ԵՄ գործընկերները համաձայնեցրել են COVID-19-ի դեմ պատվաստման ծրագիրը, որը նախատեսում է նրանց բնակչության առնվազն 40%-ի պատվաստում, գրում է Reuters-ը:
Վաղ պատվաստումների ԵՄ-ի թիրախը երկու անգամ ավելի մեծ է, քան ԱՀԿ-ի կողմից սահմանված նպատակը, որն ուղղված է աշխարհի ամենախոցելի մարդկանց 20%-ի համար գնումների համաշխարհային սխեմայի միջոցով պատվաստանյութեր գնելուն:
ԵՄ գնահատականների համաձայն, առաջնային պատվաստում պահանջող բնակչության մասնաբաժինը կլինի առնվազն 40%, ինչը էապես կնվազեցնի հասանելի չափաբաժինների առկայությունը պակաս զարգացած երկրների համար:
Ակնկալվում է, որ այն պատվաստանյութերի մատակարարումը, որոնք կարող են հաջողակ լինել, սահմանափակ կլինի երկար ժամանակ, քանի որ արտադրական հզորությունները սահմանափակ են:
Փաստաթուղթը դասակարգում է որպես «առաջնահերթ խմբեր» ավելի քան 200 միլիոն մարդու՝ ԵՄ-ի 450 միլիոն բնակչությունից, ներառյալ քրոնիկ հիվանդություններ ունեցող անձինք, տարեցները եւ բուժաշխատողները:
Առողջ մարդիկ, ովքեր աշխատում են կարեւոր պետական ոլորտներում, ինչպիսիք են կրթությունը եւ հասարակական տրանսպորտը, նույնպես ընդգրկված են առաջնահերթ խմբում, չնայած ԵՄ փաստաթղթում նրանց թվի վերաբերյալ ոչինչ չկա:
Փաստաթղթում ասվում է, որ ծրագրի նպատակը ԵՄ բնակչության համար կոլեկտիվ իմունիտետի ձեռքբերումն է, ինչին հնարավոր է հասնել պատվաստումների հետագա արշավների միջոցով՝ 40% նպատակին հասնելուց հետո:
Փաստաթղթը չի նշում, թե որքան արագ հնարավոր կլինի հասնել նպատակին, բայց նախանշում է այն նյութատեխնիկական ապահովումը, որը պետք է իրականացվի պատվաստումների լայնածավալ ծրագրի համար:
Եվրահանձնաժողովը, ԵՄ գործադիր մարմինը, բազմիցս հայտարարել է, որ աջակցում է գլոբալ, ներառական մոտեցմանը COVID-19 պատվաստանյութերի նկատմամբ, որն ուղղված է աշխարհում բոլորի համար հավասար հասանելիության ապահովմանը:
Սակայն այն իրականացնում է այն, ինչը կարելի է համարժեք համարել «Եվրոպան նախեւառաջ» ռազմավարությանը, որն առաջնահերթություն է տալիս ԵՄ բնակչությանը՝ խաթարելով գլոբալ մոտեցումը:
Հանձնաժողովը ԵՄ 27 երկրներին խնդրել է պատվաստանյութերը չգնել ԱՀԿ գնումների սխեմայով եւ փոխարենը օգտագործել բացառապես ԵՄ այլընտրանքային պլանը, որը, նրա կարծիքով, ավելի արագ եւ էժան կլինի: Այս մոտեցումը կարող է թուլացնել գլոբալ գնումները, որոնց համար պետք է վճարվի մինչեւ հաջորդ շաբաթ:
Հանձնաժողովը հայտարարել է, որ կարող է ֆինանսական աջակցություն ցուցաբերել ԱՀԿ սխեմային եւ նվիրաբերել պատվաստանյութեր, որոնք ձեռք են բերվել ԵՄ սխեմայով:
ԵՄ-ն ակնկալում է, որ ցանկացած հասանելի պատվաստանյութ կօգտգաործվի կրկնակի ներարկումով, ինչը հետագայում կնվազեցնի զարգացող երկրներին հասանելի չափաբաժինները: