Հայաստանի երկրորդ նախագահ Ռոբերտ Քոչարյանի եւ մյուսների գործով դատարանը սեպտեմբերի 8-ի նիստը սկսեց նախորդ նիստին փաստաբան Միհրան Պողոսյանի բացակայության պատճառները պարզելով։
Հիշեցնենք, որ դատավարությունն ընդհատվել էր օգոստոսի սկզբին փաստաբաններից մեկի արձակուրդի պատճառով։
Վատ ակուստիկայի պատճառով դահլիճի համար անհայտ մնաց, թե Պողոսյանը դատարանին կոնկրետ ինչ հայտնեց։ Դատավոր Աննա Դանիբեկյանը նշեց, որ փաստաբանի կողմից դատարանին է փոխանցվել էպիկրիզ (ինչից հետեւում է, որ փաստաբանի բացակայության պատճառը կապված է առողջական վիճակի հետ)։ Դատարանը չհրապարակեց բժշկական փաստաթղթի բովանդակությունը։
Դատախազ Գեւորգ Բաղդասարյանը նշեց, որ եթե բացակայությունն իսկապես պայմանավորված է փաստաբանի նշած պատճառով, ապա այն հարգելի է։ Սակայն հավելեց, որ փաստաբանը դատարանին տեղեկացրել էր ոչ բավարար պատշաճ ձեւով, ինչի հետ էլ կապված էր նախորդ նիստին Բաղդասարյանի քննադատական հայտարարությունը։
Հիշեցնենք, որ փաստաբանն այդ ժամանակ գրություն էր ուղարկել, որի համաձայն նրա բացակայությունը կապված էր անհետաձգելի հանգամանքների հետ։
Դատարանը փաստաբանի բացակայությունը հարգելի ճանաչեց։