Համաշխարհային առաջնորդները չպետք է փորձեն քաղաքականացնել COVID-19 կորոնավիրուսի դեմ պայքարը, հայտարարել է Չինաստանի նախագահ Սի Ցզինպինը, հաղորդում է «Ինտերֆաքս»-ը:
«Քաղաքականացման եւ մարգինալացման փորձերը պետք է մերժվեն»,- ասել է նա ՄԱԿ Գլխավոր ասամբլեային ուղղված տեսանյութում՝ անդրադառնալով հիվանդությանը: Ցզինպինի խոսքով՝ «վիրուսը կպարտվի, մարդկությունը կհաղթի»:
Նա կոչ է արել բոլոր երկրներին միասին աշխատել այս նպատակին հասնելու համար եւ համագործակցել ԱՀԿ-ի հետ: Սի Ցզինպինը նշել է, որ Չինաստանի իշխանությունները ձգտում են խաղաղ ճանապարհով լուծել համաշխարհային ասպարեզում առկա բոլոր խնդիրները, քանի որ իրենց պատերազմներ պետք չեն: «Մենք չենք ցանկանում ներքաշվել սառը կամ «տաք» պատերազմի մեջ»,- ասել է նա տեսաուղերձում:
ՉԺՀ ղեկավարն ընդգծել է, որ Չինաստանը կողմ է վիճահարույց հարցերի շուրջ այլ երկրների հետ երկխոսությանն ու բանակցություններին: Խոսելով աշխարհում տիրող իրավիճակի մասին՝ նա մտահոգություն է հայտնել «քաղաքակրթությունների հնարավոր բախման» վերաբերյալ:
Ավելի վաղ ԱՄՆ նախագահ Դոնալդ Թրամփը ՄԱԿ-ին կոչ էր արել Չինաստանին պատասխանատվության ենթարկել աշխարհում COVID-19 կորոնավիրուսի տարածման համար:
