Պեկինը կոչ է արել ներմուծողներին խուսափել սառեցված սնունդ ներմուծել այն երկրներից, որոնք տառապում են նոր կորոնավիրուսի լուրջ բռնկումներից: Հայտարարությունն արվել է մի քանի դեպքից հետո, երբ ներմուծված ծովամթերքներում կորոնավիրուսի մի քանի դեպք էր հայտնաբերվել, հաղորդում է Reuters-ը:
«Մաքսային եւ տեղական իշխանությունները բազմիցս կորոնավիրուս են հայտնաբերել ներմուծված արտադրանքի մեջ` ապացուցելով, որ վարակման վտանգ կա»,- նշվում է Պեկինի մունիցիպալ առեւտրային բյուրոյի` ներմուծող ընկերություններին ուղղված հայտարարության մեջ:
Բյուրոն հորդորել է ուշադիր հետեւել համավարակի հետ կապված իրավիճակին արտերկրում եւ «ակտիվորեն խուսափել սառը շղթայի արտադրանքի ներմուծումից կորոնավիրուսից տուժած տարածքներից» եւ ներմուծման այլընտրանքային պլաններ մշակել:
Այն նաեւ խնդրել է ընկերություններին բարելավել իրենց նախազգուշացման եւ հաշվետվողականության մեխանիզմները եւ իշխանություններին արագորեն հայտնել արդյունքների մասին:
Այս ամիս Չինաստանը մեկ շաբաթ եւ ավել ժամկետով դադարեցրել էր ծովամթերքի ներմուծումը Բրազիլիայից, Ինդոնեզիայից եւ Ռուսաստանից: