NEWS.am-ը հրապարակում է Ադրբեջանական ԽՍՀ-ից հայ փախստականների ներկայացուցիչների համագումարի հայտարարությունը ՄԱԿ-ի փախստականների հարցերով գերագույն հանձնակատար Անտոնիո Գուտիերեշի Հայաստան կատարած այցի կապակցությամբ.
«Ադրբեջանական ԽՍՀ-ից հայ փախստականների ներկայացուցիչների համագումարը Հայաստանում աշխատում է ավելի քան երկու ամիս: Համագումարը խնդիր է դրել մեկ քաղաքական միության մեջ միավորել Ադրբեջանում եւ Նախիջեւանում խտրականության բոլոր զոհերին: Ադրբեջանական ԽՍՀ հայերի միությունը մտադիր է ինքնուրույն պայքարել մարդու քաղաքական, քաղաքացիական, տնտեսական, սոցիալական եւ մշակութային բոլոր խախտված իրավունքների համար: Մենք խորապես ցավում ենք, որ ՄԱԿ-ի փախստականության գծով Գերագույն հանձնակատարը ցանկություն չունեցավ հանդիպելու մարդկանց հետ, ովքեր փորձում են հիշյալ տարածքներում խտրականության հետեւանքները լիովին վերացնել:
Մենք բոլորովին բավարարված չենք Հայաստանի ղեկավարության դիրքորոշմամբ: Նրանք իրենց միջազգային դերը տեսնում են Հայաստանում Ադրբեջանական ԽՍՀ-ից փախստականների համար միայն ապրելու պայմաններ ստեղծելու մեջ: Մենք խորապես ցավում ենք, որ դարեր շարունակ մեր նախնիների ապրած տարածքներում գտնվող մեր տներն արժանապատվորեն ու անվտանգ վերադառնելու մեր անառարկելի իրավունքը Հայաստանի կողմից պատշաճ արձագանք չի ստանում: Մենք վճռականորեն բողոքում ենք հիշյալ տարածքներում խտրականության, բռնագաղթի եւ էթնիկ մաքրումների իրականացված քաղաքականության հետեւանքներն ամրագրող բոլոր միջոցների իրագործումների դեմ:
Մենք խորապես անհանգստացած ենք այն փաստով, որ հակամարտության կարգավորման պատասխանատու պետական եւ միջազգային որեւէ կառույց մինչեւ այսօր պատշաճ ուշադրություն չի դարձնում ժողորվրդագարական կառուցվածքը եւ դարեր շարունակ հայերի կենսապահովման տարածքների կարգավիճակը փոխած խտրականության հետեւանքների վերացմանը: Այս հետեւողական քաղաքականությունը մեզ հարկադրում է միավորվել եւ միջազգայնորեն ընդունված իրավունքի հնարավորությունների շրջանակներում ինքնուրույն պայքարել մեր շահերի համար:
Մենք խորապես համոզված ենք, որ մարդու իրավունքի սկզբունքները բազմակողմանի ու անվերապահ հարգելող սկզբունքները չպահպանելով հնարավոր չէ վերջնականապես կարգավորել Լեռնային Ղարաբաղի կոնֆլիկտը եւ ամուր խաղաղություն հաստատել ժողովուրդների մեջ: Ուստի մենք հույս ունենք, որ սույն հայտարարությունը կխթանի ՄԱԿ-ի փախստականության գծով Գերագույն հանձնակատարին միջոցներ ձեռնարկելու Ադրբեջանական ԽՍՀ-ի հայերի ներկայացուցիչների Միության հետ շարունակական երկխոսություն հաստատելու»:
