Ղրղզստանի Ազգային բանկը երկրի առեւտրային բանկերին խորհուրդ է տվել ժամանակավորապես դադարեցնել իրենց գործունեությունը՝ պայմանավորված հասարակական-քաղաքական բարդ իրավիճակով։ Այս մասին նշված է Ազգային բանկի այսօր հրապարակված հաղորդագրության մեջ։
«Ղրղզական Հանրապետության Ազգային բանկը երկրի ֆինանսա-բանկային հատվածի անվտանգության ապահովման եւ ոչ բանկային ֆինանսավարկային կազմակերպությունների ակտիվների պահպանման նպատակներով առեւտրային բանկերին եւ ոչ բանկային ֆինանսավարկային կազմակերպություններին խորհուրդ է տալիս 2020 թվականի հոկտեմբերի 7-ին դադարեցնել իրենց գործունեությունը եւ անվտանգության միջոցառումներն ուժեղացնել մինչեւ երկրում քաղաքական իրավիճակի կայունացումը»,- նշված է հաղորդագրության մեջ։
Հանրապետության գլխավոր ֆինանսական կարգավորողը նշում է, որ երկրում գոյություն ունեցող «Էլքարտ» ազգային վճարային համակարգը շարունակում է «ապահովել անկանխիկ վճարումների հնարավորությունը»։ Դա, սակայն, վերաբերում է միայն Ղրղզստանի ներսում կատարվող գործարքներին։ «Դադարեցված են համակարգերը, որոնք ապահովում են ազգային արժույթով դրամական միջոցների փոխանցումը, ինչպես նաեւ միջազգային վճարային համակարգերով, որը թույլ է տալիս իրականացնել անդրսահմանային վճարումներ»,- ընդգծված է հաղորդագրության մեջ։
Ղրղզստանի Ազգային բանկը հավաստիացրել է, որ «հետեւում» են հանրապետության իրավիճակին եւ անհրաժեշտության դեպքում միջոցառումներ կձեռնարկեն «երկրի ֆինանսական եւ բանկային համակարգի կայունության ու անվտանգության ապահովման» համար։
