Պռոշյան 12 հասցեում գործող «Ստարտափ Հայաստան» հիմնադրամի գրասենյակում կամավորները 12 վոլտանոց անխափան սնուցման սարքավորումները՝ UPS-ները, դարձնում են 220 Վոլտ` դիրքերում զինվորներին հոսանքով ապահովելու համար։

Նախաձեռնության կազմակերպիչ Կարեն Դերձյանը NEWS.am-ի հետ զրույցում պատմեց՝ 100-ից ավելի կամավորներ ունեն, որոնք իրար հերթափոխելով տքնաջան աշխատում եմ։ Մեկը հումանիտար օգնություն է բերում, մյուսը գիտելիքներով է օգնում, երրորդն էլ զոդում է իրականացնում։ Արդեն 1000 UPS–ներ են վերազինել և ուղարկել Արցախ։

Կամավորների շարքում են նաև դպրոցահասակ երեխաներ։ Մեծահասակներին օգնում են իրենց ուժերի չափով՝ կատարած աշխատանքի դիմաց «պարգևատրվելով» կոնֆետներով։

«Պատերազմ է ընթանում նաև թիկունքում։ Թիկունքն ամուր ենք պահում։ Մասնակցում եմ տարբեր կամավորական աշխատանքների մինչև սահման գնալու իմ հերթը գա»,- ասաց կամավոր Արամ Հարությունյանը։