Շաբաթ օրվանից Հունաստանի, այսպես կոչված, «կարմիր» եւ «նարնջագույն» գոտիներում (ամենաբարդ համաճարակաբանական իրավիճակ ունեցող տարածաշրջանները, ներառյալ մայրաքաղաքային Ատտիկա շրջանը) ժամը 00:30-05:00-ը պարետային ժամ է մտցվում: Այս մասին քաղաքացիներին ուղղված հեռուստատեսային ուղերձում հայտարարել է վարչապետ Կիրիակոս Միցոտակիսը, հայտնում է RG-ն:
«Նպատակը ուղեւորությունների եւ երեկոյան հավաքների քանակը կրճատելն է, որոնք նպաստում են վիրուսի փոխանցմանը»,- նշել է վարչապետը: «Մենք ժամանակավորապես կապրենք ավելի քիչ հաճույքով, բայց ավելի առողջ»:
Բացի այդ, դիմակ կրելը այս գոտիներում, ներառյալ՝ փակ տարածքներում, կդառնա պարտադիր: «Դիմակը պատվաստանյութ է պատվաստանյութից առաջ»,- ասել է Միցոտակիսը: «Եթե երկու քաղաքացիներ այն ճիշտ են կրում, իսկ մեկը վարակված է, ապա միասին լինելու դեպքում փոխանցման հավանականությունն աննշան է»:
Հունաստանը շարունակում է վարակվածների թվով ազգային ռեկորդներ սահմանել: Այս օրը բացառություն չէ: Անցած օրվա ընթացքում 882 մարդու մոտ կորոնավիրուս է հայտնաբերվել: Նման ցուցանիշ այս երկրում չի եղել համավարակի սկզբից: 15 մարդ մահացել է: Վարակվածների ընդհանուր թիվը 28 216 է: Վերակենդանացման բաժանմունքներում 90 պացիենտ կա: