Իմ կարծիքով «Հոկտեմբերի 27-ի» ոճրագործությունը տեղի է ունեցել Ղարաբաղի հիմնահարցի պատճառով: Այս մասին, այսօր՝ հոկտեմբերի 27-ին, Եռաբլուր պանթեոնում լրագրողների հետ զրույցում ասաց «Հանրապետություն» կուսակցության ղեկավար Արամ Զ. Սարգսյանը:
«Վստահ եմ, որ եթե հոկտեմբերի 27-ը չլիներ, դժվար թե Ադրբեջանը մի օր քնից արթնանար ու մտածեր, որ կարող է պատերազմ սկսել, կամ շատ երկար կմտածեր նման քայլ անելուց առաջ: Ակնհայտ էր, որ ոտքի ենք կանգնում, ուժ ենք հավաքում, այլ հնարավորությունների, այլ հզորության, այլ ժամանակների բանակ էինք ունենալու: Հավանաբար երեւի նաեւ էդ մեղքի համար է, որ այս պատերազմը չի վերջանում: Աստծո առաջ մեղք ենք գործել, դրա համար պատերազմը չի վերջանում: Պիտի կարողանանք գոնե այս անգամ վերջակետ դնել, խնդիրները վերջնական լուծել, որովհետեւ անընդհատ թողնել հաջորդ սերնդին, դա ձեւ չի»,-ասաց նա:
Անդրադառնալով այս պահին Արցախում ընթացող պատերազմին, Արամ Սարգսյանը նշեց. «Հողը, հայրենիքը պաշտպանել է պետք, եւ յուրաքանչյուրը ինքը պետք է որոշի, թե ինչպես պաշտպանի հայրենիքը: Ինչքան ես եմ հասկանում, իսկապես, պատերազմն արդեն որոշակի ժամանակ է վերցնելու: Պետք է սովորել պատերազմի պայմաններում ապրելուն, պետք է կառույցներ ձեւավորել համապատասխան այդ ընթացքի համար:
Պետք չի հուսահատվել, մենք առաջնագծում զինվորներ ունենք, որոնք խիզախաբար կռվում են: Պիտի ռազմադաշտ գնան նրանք, որոնք հավատում են հաղթանակին, որոնք պատրաստ են կռվելու, ոչ թե ինչ-ինչ պատճառներով ստիպված են գնալ էնտեղ, հետո հետ գալ: Դա ավելի վատ հետեւանքներ է ունենալու: Չպետք է ձեռքները ծալել, չպետք է թեւաթափ լինել, պիտի հարգել զոհերի շիրիմները, այս իրավիճակից ելքեր փնտրել, լցվել լավատեսությամբ»: