Դանիական ջրաքիսների ֆերմաներում կորոնավիրուսի նոր շտամի հայտնաբերումը հանգեցրել է երկրի հյուսիսում առողջապահության խիստ միջոցների կիրառմանը, եւ եվրոպական մի շարք երկրներ նույնպես արձագանքել են բռնկմանը:
Դա տեղի է ունեցել Դանիայի վարակիչ հիվանդությունների վերահսկման ազգային մարմնի նախազգուշացումից հետո, որ եթե մուտանտ-վիրուսը միջազգային տարածում գտնի, դա կարող է «լուրջ հետեւանքներ» ունենալ Covid-19-ի դեմ ապագա պատվաստանյութի համար:
Ուրբաթ օրը Դանիայի հյուսիսում ավելի քան քառորդ միլիոն մարդ կարանտինի է անցել, եւ քաղաքացիներին կոչ է արվել հետազոտություն անցնել այն բանից հետո, երբ այդ տարածաշրջանում ջրաքիսերի մոտ Covid-19 է հայտանաբերվել:
Յոթ քաղաքներում ռեստորանները փակ են, իսկ հինգերորդ եւ ավելի բարձր դասարանցիները պետք է անցնեն հեռավար ուսուցման:
Մեծ Բրիտանիայի կառավարությունը ավելի խիստ կանոններ է մտցրել Դանիայից ժամանողների համար: Վերջին 14 օրվա ընթացքում Դանիայում գտնվող կամ երկրով ճանապարհորդած բեռնատարների վարորդներին, ովքեր Մեծ Բրիտանիայի ռեզիդենտ չեն, կմերժվի երկիր մուտքը: Կդադարեցվի նաեւ Դանիայից բոլոր ուղեւորատար նավերի եւ դրանց ուղեկցող բեռների մուտքը:
Իռլանդիայում սկանդինավյան այս երկրից ժամանող ուղեւորներին հանձնարարվել է նախազգուշական լրացուցիչ միջոցներ ձեռնարկել` կորոնավիրուսի վերջերս հայտնված շտամի տարածումը զսպելու համար:
Իռլանդիայի կառավարությունը հայտարարել է, որ մարդիկ Դանիայից երկիր մուտք գործելուց հետո 14 օր պետք է սահմանափակեն իրենց տեղաշարժը, նույնիսկ եթե նրանք այցելում են երկիր «կարեւոր» նպատակով:
