Բաքվի զորահանդեսի սիմվոլիզմը խորը քաղաքական չափում ունի: Արեւելագիտական ուսումնասիրությունների կենտրոնի ղեկավար Վլադիմիր Ավատկովը նշում է, որ կառուցվում է միջազգային հարաբերությունների նոր խնդրահարույց հանգույցի առանցքը: Բաքվում համատեղ զորահանդեսը, առաջին հերթին, ցույց է տալիս տարածաշրջանում Թուրքիայի ազդեցության ընդլայնումը: Անկարան ոչ միայն դիվանագիտական, այլ նաեւ ռազմական աջակցություն է ցուցաբերել Ադրբեջանի Ղարաբաղյան հակամարտությունում, հաղորդում է Life-ը:
«Ավելին, Իսրայելի հետախուզությունում հայտարարել են, որ Ադրբեջանն իրենց համար ռազմավարական գործընկեր է: Ավելի վաղ ԶԼՄ-ներում բազմիցս տեղեկություններ են տարածվել այն մասին, որ «Մոսադը» օգտվում է Բաքվի հետ կապերից Իրանին հետեւելու համար: Թեհրանում «միջուկային ռումբի հայր» Մոհսեն Ֆահրիզադեի սպանությունից հետո հայտարարել են իսրայելական հետքի մասին, իսկ երեկ այնտեղ ձերբակալել են մահափորձի կազմակերպիչներին: Իրանի ղեկավարությունը խոստանում է «արժանի պատասխան» տալ: Սակայն դեկտեմբերի 8-ին Իսրայելում Ռուսաստանի դեսպանը քննադատեց Իսրայելին՝ հայտարարելով, որ Իսրայելն ապակայունացնում է Մերձավոր Արեւելքում իրավիճակն ավելի շատ, քան Իրանը:
Այսօր Իրանը մեծ դեր ունի տարածաշրջանային եւ համաշխարհային քաղաքականության մեջ: Հակաիրանական ճամբարի ձեւավորում է տեղի ունենում, որտեղ Իսրայելին աստիճանաբար միանում են արաբական երկրները: Այս տարի խաղաղ պայմանագրեր են կնքվել ԱՄԷ-ի, Բահրեյնի եւ Սուդանի հետ: Միջնորդ է հանդիսացել ԱՄՆ-ն: Վաշինգտոնի եւ Թել Ավիվի հետ Անկարայի հարաբերությունները սրվել են: Դրանց անսպասելի լավացման մասին խոսելու կարիք չկա: Սակայն Թուրքիան՝ հետապնդելով սեփական շահերը տարածաշրջանում, հայտնվել է այնտեղ, որտեղ պետք էր ՆԱՏՕ-ի իր գործընկերներին: Փաստացի Մոսկվայի կողմից առաջարկված՝ Մերձավոր Արեւելքի անվտանգության ճարտարապետությունը բախվում է նոր ռիսկերի: Ղարաբաղի համատեքստում դա նշանակում է նոր խնդրահարույց հանգույցի ձգձգում»:
