Հունաստանի վարչապետ Կիրիակոս Միցոտակիսն ամբողջ Եվրամիության համար կորոնավիրուսի դեմ պատվաստման սերտիֆիկատ ստեղծելու կոչ է արել, որպեսզի վերականգնվեն անդրսահմանային ուղեւորությունները, հաղորդում է Reuters-ը:
Հունաստանը, որը ձգտում է վերածնել տուրիզմը մինչեւ ամռան սկիզբ, արդեն ստեղծել է սեփական սերտիֆիկատը, որը հաստատում է, որ մարդը պատվաստվել է:
Եվրահանձնաժողովի նախագահ Ուրսուլա ֆոն դեր Լյայենին ուղղված նամակում Միցոտակիսն առաջարկել է այդ սխեման տարածել ԵՄ բոլոր 27 երկրների վրա: «Չնայած նրան, որ մենք չենք պատրաստվում պատվաստումը պարտադիր պայման դարձնել ուղեւորության համար, անձինք, ովքեր պատվաստում են անցել, պետք է ճանապարհորդելու հնարավորություն ունենան: Անհրաժեշտ է անհապաղ ընդհանուր համաձայնության հասնել»,-նշել է նա:
Նրա խոսքով՝ ԵՄ ուղեւորների գտնվելու վայրի սահմանման էլեկտրոնային ընդհանուր ձեւի (PLF) համաձայնեցման բարդությունը ցույց է տվել, որ կա անհրաժեշտություն ԵՄ պայմաններում բարձր մակարդակով առաջ շարժվելու համար: «Այնպիսի երկրների համար, ինչպիսին Հունաստանն է, որը կախված է տուրիզմից, չափազանց կարեւոր է այդ հարցի անհապաղ լուծումը»,-ասվում է Միցոտակիսի նամակում:
