Հունվարի 13-ին Չինաստանի իշխանությունները գրանցել են նոր կորոնավիրուսի առաջացրած հիվանդությունից հետո բարդությունների հետեւանքով պացիենտի մահ: Այս մասին նշված է Չինաստանի հիգիենայի եւ առողջապահության հարցերով պետական կոմիտեի կայքում հրապարակված հաղորդագրության մեջ, փոխանցում է ՏԱՍՍ-ը:
«Անցած օրվա ընթացքում գրանցվել է հիվանդության 138 նոր հաստատված դեպք, մահվան մեկ նոր դեպք»,- նշված է տեքստում: Գերատեսչության վիճակագրության համաձայն՝ Չինաստանում մահվան նոր դեպքեր չէին եղել 2020 թվականի մայիսի 16-ից ի վեր: Չինական լրատվամիջոցները երեկ նշել էին, որ մահվան դեպքը գրանցվել է Հեբեյ նահանգում կորոնավիրուսով վարակվելու հետեւանքով:
Անցած օրվա ընթացքում հայտնաբերված 138 նոր դեպքերի թվում 14-ը բերովի են. 8-ը հայտնաբերվել է Շանհայում, 3-ը՝ Գուանդուն նահանգում, մեկական դեպք՝ Պեկինում, Հենան նահանգում եւ Գուանսի-Չժուանսյան ինքնավար շրջանում: Եվս 124 դեպքեր ներքին են. դրանցից 81-ը հայտնաբերվել է Հեբեյ նահանգում, 43-ը՝ Հեյլունցզյան նահանգում: