Ազգային ժողովն օրակարգում չներառեց «Ընթացիկ իրավիճակի եւ դրանից ելքի ուղիների մասին, ինչպես նաեւ 2020 թվականի նոյեմբերի 9-ին Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիեւի եւ Ռուսաստանի նախագահ Վլադիմիր Պուտինի ստորագրած հայտարարության իրավազորության մասին» խորհրդարանի որոշման նախագիծը: Դեմ հանդես եկավ «Իմ քայլի» 73 պատգամավոր, կողմ՝ «Լուսավոր Հայաստանի» եւ «Բարգավաճ Հայաստանի» 40 պատգամավոր:
Որոշման նախագծի հեղինակ, «Լուսավոր Հայաստանի» պատգամավոր Տարոն Սիմոնյանի խոսքով՝ բացթողումները, որոնք թույլ է տվել գործող իշխանությունն այդ ընթացքում եւ հատկապես եռակողմ հայտարարության ստորագրման ժամանակ երկիրը սպառնալիքի առջեւ են կանգնեցրել եւ կարող են հանգեցնել Հայաստանի համար անցանկալի հետեւանքների:
Նա հիշեցրեց, որ խոսքը որոշման նախագծի մասին է, որի քննարկումն ավելի վաղ արգելափակել է «Իմ քայլը», քանի որ նրա ներկայացուցիչները ներկա չեն եղել ԱԺ խորհրդի նիստին: Նա նաեւ նկատեց, որ ՀՀ վարչապետը կարող է ստորագրել այս կամ այն հայտարարությունը, սակայն նոյեմբերի 9-ի հայտարարության դեպքում ստացվեց, որ Հայաստանը, փաստացի, ստանձնեց որոշ պարտավորություններ պետական մակարդակով, իսկ դա չէր կարող տեղի ունենալ առանց ԱԺ համապտասխան որոշման, քանի որ Հայաստանը խորհրդարանական հանրապետություն է:
Սիմոնյանը նշեց, որ նոյեմբերի 9-ի հայտարարությունը, հաշվի առնելով իրականացված կետերը, որոնք նշված են դրանում, տվյալ հայտարարությունը փաստացի վերածել է համաձայնագրի՝ բարձրացնելով դրա իրավական նշանակությունը: Դրանից ելնելով՝ «Լուսավոր Հայաստանն» առաջարկում է վարչապետի գործողություններն անօրինական համարել: Նախագծի հեղինակը կարծում է, որ ՀՀ կառավարությունը, փաստացի, չարաշահել է իր պաշտոնեական լիազորությունները՝ ստանձնելով խորհրդարանի գործառույթներն ու պարտավորությունները: