ԱՄՆ Կալիֆոռնիայի նահանգի համաճարակաբան Էրիկա Պանը կոչ է արել դադարեցնել կորոնավիրուսի դեմ Moderna ընկերության պատվաստանյութի խմբաքանակի բաշխումը՝ հնարավոր ալերգիկ ռեակցիաների պատճառով, ասվում է տեղական առողջապահության նախարարության կայքում հրապարակված հաղորդագրության մեջ, փոխանցում է «ՌԻԱ Նովոստին»:
Հաղորդվում է, որ Կալիֆոռնիային Moderna-ի այս մատակարարումը իրականացվել է հունվարի 5-12-ը: Այս խմբաքանակից պատվաստանյութերի ավելի քան 330 000 դոզան բաժանվել է նահանգի 287 մատակարարներին:
«Հնարավոր ալերգիկ ռեակցիաների սովորականից ավելի դեպքեր են գրանցվել` կապված հիվանդանոցում Moderna պատվաստանյութի որոշակի խմբաքանակի ներդրման հետ: 24 ժամվա ընթացքում մինչեւ 10 մարդ բժշկական օգնության կարիք է ունեցել»,- ասել է նա: Ինչպիսի ալերգիկ ռեակցիաներ են նկատվել հիվանդների մոտ, չի նշվում:
Համապատասխան առողջապահական տեղեկատվությունը ներկայումս ուսումնասիրում են Հիվանդությունների վերահսկման եւ կանխարգելման կենտրոնը (CDC), Սննդամթերքի եւ դեղերի որակի վերահսկողության վարչությունը (FDA) եւ պատվաստանյութի արտադրողը:
«Ելնելով ծայրահեղ զգուշությունից՝ մենք խորհուրդ ենք տալիս մատակարարներին օգտագործել պատվաստանյութի այլ մատչելի պաշարներ եւ կասեցնել Moderna-ի պատվաստանյութի 041L20A խմբաքանակի ներարկումը՝ մինչեւ CDC-ի, FDA-ի եւ Moderna-ի հետազոտությունների ավարտը»,- հավելել է համաճարակաբանը:
Կալիֆոռնիայի իշխանությունների վերջին տվյալների համաձայն՝ նահանգում արձանագրվել է կորոնավիրուսի վարակի ավելի քան 2,9 միլիոն դեպք, մահացել է 33 300 մարդ:
