Տանզանիայի նախագահը կասկածներ ունի COVID-19-ի դեմ պատվաստանյութերի արդյունավետության վերաբերյալ: Նա Տանզանիայից դուրս պատվաստված մարդկանց մեղադրել է նոր վարակներ երկիր բերելու մեջ, հայտնում է AFP-ն:
«Եթե սպիտակ մարդը կարողանար պատվաստումներ անել, ապա պատվաստումներ կարվեին ՁԻԱՀ-ի դեմ, տուբերկուլյոզն արդեն անցյալում կլիներ, պատվաստանյութեր կգտնվեին մալարիայի եւ քաղցկեղի դեմ»,- ասել է նախագահ Ջոն Մագուֆուլին: Նա նաեւ նախազգուշացրել է, որ տանզանիացիները որպես պատվաստանյութերի «փորձարկման ճագարներ» չեն օգտագործվի:
Մագուֆուլին, որը ոչ մի ապացույց չի ներկայացրել իր կասկածները հաստատելու համար, լայն քննադատության է ենթարկվել այն բանի համար, որ հայտարարել է , թե Տանզանիայում կորոնավիրուսը հաղթահարված է: Անցյալ տարվա կեսերից երկիրը չի թարմացրել հաստատված վարակների թիվը, որն այն ժամանակ 509 է եղել:
Մագուֆուլին նաեւ ենթադրել է, որ պատվաստանյութի մատակարարումը դավադրության մաս է՝ Աֆրիկայի հարստությունը գողանալու համար. «Մի կարծեք, թե ձեզ այդքան շատ են սիրում: Տանզանիան հարուստ է: Աֆրիկան հարուստ է: Բոլորն ուզում են ձեռք բերել այն»:
Նախկինում նախագահը տանզանիացիներին կոչ էր արել չպահպանել սոցիալական հեռավորությունը` միեւնույն ժամանակ խրախուսելով նրանց հիվանդությունը բուժելու համար օգտագործել չստուգված դեղաբույսեր: Նա նաեւ կասկածի տակ է դրել տրամադրված վիրուսի թեստերի արժանահավատությունը:
Նրանք, ովքեր դեմ են հանդես եկել կառավարության այն դիրքորոշմանը, թե Տանզանիայում կորոնավիրուս չկա, ձերբակալվել են:
