Ֆրանսիայում գիշերային պարետային ժամը չի նպաստում կորոնավիրուսի տարածման դանդաղեցմանը, եւ իշխանությունները քննարկում են ավելի խիստ սահմանափակումների հնարավորությունը: Այս մասին հայտարարել է կառավարության պաշտոնական ներկայացուցիչ Գաբրիել Ատալը, հայտնում է Reuters-ը:
Պարետային ժամը գործում է երեկոյան 18:00-ից առավոտյան 6:00-ն, բայց տվյալները ցույց են տալիս հոսպիտալացումների եւ մահերի աճ: «Տվյալները ցույց են տալիս, որ ներկայում պարետային ժամը բավարար չի զսպում վիրուսի տարածումը»,- հայտարարել է Ատալը:
Նրա խոսքով՝ քննարկվող տարբեր սցենարները տատանվում են ստատուս-քվոյի պահպանման եւ շատ խիստ մեկուսացման միջեւ:
Ֆրանսիայում արդեն փակ են ռեստորանները, բարերը, թանգարանները եւ լեռնադահուկային հանգստավայրերը, իսկ դպրոցները դեռ բաց են: Խանութները նույնպես մնում են բաց, բայց ներսում այցելուների քանակի սահմանափակումներով:
Անցյալ գարնան առաջին կարանտինի ժամանակ Ֆրանսիան փակել էր բոլոր դպրոցներն ու համալսարանները եւ արգելել էր քաղաքացիներին լքել իրենց տները՝ բացի սննդի գնումներից, կարեւոր աշխատանքից, բժշկական օգնությունից եւ կարճատեւ սպորտային վարժություններից: