Հնդկաստանի 1,35 միլիարդ բնակչությունից մոտավորապես յուրաքանչյուր չորրորդը, հնարավոր է, վարակվել է կորոնավիրուսով: Այս մասին հայտնում է Reuters-ը՝ հղում անելով աղբյուրին, որն անմիջականորեն ծանոթ է կառավարության շճաբանական հետազոտությանը:
Հնդկաստանում պաշտոնապես հաստատվել է COVID-19-ով վարակման 10,8 միլիոն դեպք: Բայց ուսումնասիրությունները ցույց են տալիս, որ Հնդկաստանում դեպքերի փաստացի թիվը, հնարավոր է, գերազանցել է 300 միլիոնը:
Հնդկաստանի բժշկական հետազոտությունների պետական խորհուրդը (ICMR), որն անցկացրել է ուսումնասիրությունը, հայտարարել է, որ արդյունքների մասին շուտով կհայտնեն։
Օգոստոսին եւ սեպտեմբերին արված մեկ այլ ուսումնասիրությունից հետո, որի ընթացքում օգտագործվել են 10 տարեկանից բարձր ավելի քան 29 000 մարդկանց արյան նմուշներ, ICMR-ը եզրակացրել է, որ յուրաքանչյուր 15 հնդիկներից մեկը ունի COVID-19-ի հակամարմիններ:
Խիտ բնակեցված քաղաքային հետնախորշերում այդ ցուցանիշը հասել է յուրաքանչյուր վեցից մեկի: Այս շաբաթ մայրաքաղաք Նյու Դելիի կառավարության կողմից հրապարակված ուսումնասիրությունը ցույց է տվել, որ 20 միլիոն բնակիչների կեսից ավելին կարող է վարակված լինել կորոնավիրուսով:
Thyrocare Technologies ախտորոշիչ ընկերության կողմից Հնդկաստանի տարածքի ավելի քան 700 000 մարդու վրա անցկացրած առանձին թեստերը ցույց են տվել, որ բնակչության 55%-ը կարող է արդեն վարակ տարած լինել:
Առողջապահության համաշխարհային կազմակերպությունը պնդում է, որ բնակչության առնվազն 60% -70%-ը պետք է իմունիտետ ունենա՝ վիրուսի փոխանցման շղթան ճեղքելու համար: Հնդկաստանը վերջին 24 ժամվա ընթացքում հայտնել է 11 039 նոր դեպքի մասին: Մահացության մակարդակն աճել է 110-ով՝ կազմելով 154 596: Վարակները եւ մահվան դեպքերը զգալիորեն նվազել են սեպտեմբերի կեսերին՝ օրական կազմելով մոտ 100 000: