Գինեսի ռեկորդների գիրքը գրանցել է նոր համաշխարհային ռեկորդ. Geely չինական ընկերությունը 750 ավտոմեքենաներով ստեղծել է վիթխարի մոզաիկա: Նվաճումը նվիրվել է Նոր տարվան. տեղական օրացույցով 2021 թվականն անցնելու է Ցլի նշանի ներքո, եւ հենց այս կենդանուն է նվիրված «ռեկորդային» կոմպոզիցիան, փոխանցում է Motor-ը:
Ըստ Գինեսի գրքի կանոնների՝ ռեկորդի հասնելու համար ավտոմեքենաների միջեւ հեռավորությունը չպետք է անցնի 20 սանտիմետրից, իսկ կոմպոզիցիայի մակերեսը պետք է լինի 3 հազար քառակուսի մետրից ոչ պակաս: Geely ընկերությունը երկու չափորոշիչներն էլ պահպանել է. մեքենաները կայանել են 4-5 սմ միջակայքով, իսկ մակերեսը անցել է 7 հազար քառակուսի մետր նիշից:
Geely-ն ընդհանուր առմամբ կառուցել է երկու մոզաիկա՝ մեկի վրա պատկերված է տարվա խորհրդանիշ ցուլը, իսկ մյուսում՝ «2021» թիվը եւ հիերոգլիֆներով մակագրություն: Գինեսի գրքի ներկայացուցիչները գրանցել են միայն 750 ավտոմեքենայով ավելի խոշոր պատկերը, չնայած «ֆլեշմոբին» ընդհանուր մասնակցել է 1339 մեքենա: Ռեկորդի համար օգտագործել են միանման Geely Emgrand՝ սպիտակ եւ մուգ մոխրագույն:
Անցյալ տարվա նոյեմբերին Գինեսի գիրքը գրանցել էր մեկ ուրիշ արտասովոր ռեկորդ՝ ֆիննացի Յուսի Կալիոնիեմին իր հաշվին էր գրանցել ավտոմեքենայի գերարագ հրման նվաճումը: